कागल मतदारसंघ यंदाच्या विधानसभा निवडणुकीत चर्चेत राहिला आहे. याठिकाणी समरजित घाटगे विरुद्ध हसन मुश्रीफ असा सामना येथे रंगला आहे. विधानसभा निवडणुकीपूर्वीच समरजित घाटगे यांनी भाजपमधून राष्ट्रवादी शरद पवार यांच्या पक्षात प्रवेश केल्याने इथे भाजपला धक्का बसला होता. तर याच पक्षप्रवेशाचा फायदा कुठेतरी मविआ आणि राष्ट्रवादी शरद पवार गटाला होताना दिसत आहे.

सकाळच्या एक्झिट पोलमधून शरद पवार गटाचे समरजित घाटगे यांना संभाव्य आमदार म्हणून मतदारांची पसंती मिळत आहे. त्यामुळे कागल मतदारसंघात शरद पवार यांच पारड जड असल्याचं बघायला मिळत आहे. शरद पवार गट विरुद्ध अजित पवार गट अशी दुरंगी लढत या मतदार संघात बघायला मिळत आहे. अजित पवार गटाकडून हसण मुश्रीफ यांना उमेदवारी मिळालेली आहे.

समरजित घाटगे हे भाजपच्या तिकिटावर विधानसभा निवडणूक लढवण्यास इच्छुक होते. मात्र महायुतीत ही जागा राष्ट्रवादी अजित पवार गटाला सुटली. त्यामुळे घाटगे नाराज होते. त्यानंतर त्यांनी शरद पवार यांच्या पक्षात प्रवेश करत तुतारी चिन्हावर निवडणूक लढवण्याचा निर्णय घेतला. ऐन निवडणुकीच्या काळात त्यांनी भाजपला रामराम ठोकल्याने भाजपला हे मोठं खिंडार या ठिकाणी पडलं. राज्यातल्या चुरशीच्या लढतीत कागल मतदारसंघाचा समावेश आहे. हसन मुश्रीफ हे ज्येष्ठ मंत्री आहेत. तरी देखील त्यांना कुठेतरी पराभव स्वीकारावा लागणार असल्याचं एक्झिट पोलमधून दिसत आहे.

समरजित घाटगे यांच्या प्रचारासाठी स्वत: शरद पवार यांनी याठिकाणी सभा घेतली होती. तर शरद पवार यांच्या बहीण सरोज पाटील यांनी देखील भावासाठी सभा घेत समरजित घाटगे यांचा प्रचार कागलमध्ये केलेल्या दिसला. यावेळी मतदारांना भावनिक साद घालत त्यांनी समरजित घाटगे यांना विजयी करण्याचं आवाहन केलं होतं. त्याचाच परिणाम आता एक्झिट पोलमध्ये बघायला मिळत असून घाटगे यांना संभाव्य आमदार म्हणून पसंती मिळत असल्याचं दिसत आहे.