काल पर्यंत उद्धव ठाकरे यांच्यासोबत असलेले आणि आदित्य ठाकरे यांच्या खांद्याला खांदा लावून फिरणारे आमदार सचिन आहिर यांनी शिंदेंच्या शिवसेनेत प्रवेश केल्यान आज सकाळी आश्चर्याचा धक्का राजकीय वर्तुळात दिला. ठाकरे गटातील 9 खासदारांपैकी 6 खासदारांनी एकनाथ शिंदे यांच्या शिवसेनेत प्रवेश केल्यावर सचिन आहिर हे कालपर्यंत त्यांच्यावर टीका करत होते. तर तिकडे उद्धव ठाकरे यांनी त्या 6 मतदारसंघात जाऊन सभा घेतल्या आणि एकनाथ शिंदे तसेच भाजपवर जोरदार हल्लाबोल केला. यालाच सचिन आहिर यांनी शिंदेसेनेत प्रवेश करत षटकार मारला असा टोला एकनाथ शिंदे यांनी उद्धव ठाकरे यांना लगावला.

तर पक्षप्रवेश झाल्यानंतर सचिन आहिर आणि एकनाथ शिंदे यांनी संयुक्त पत्रकार परिषद घेतली. यावेळी एकनाथ शिंदे आणि सचिन आहिर यांनी आपली भूमिका जाहीर केली. एकनाथ शिंदे म्हणाले, आज सचिन आहिर यांनी षटकार मारला आहे. सहा खासदारांनी आधीच षटकार ठोकले होते. आता सहा मतदारसंघातही बदल दिसून येत आहेत. सचिन अहिर यांनी षटकार मारला. चौकार आणि षटकारांची ही मालिका सुरूच राहील. समोरच्यांच्या एकेक विकेट पडत राहील, असा टोला त्यांनी उद्धव ठाकरे यांना लगावला.

तसेच खासदार फुटीनंतर राज्यात आमदार फुटीची चर्चा सुरू झाली होती. ऑपरेशन टायगर 3.O मध्ये उद्धव ठाकरे यांचे आमदार देखील शिंदे गळाला लावणार आहे असे बोलले जात असताना एकनाथ शिंदे यांनी देखील एक प्रकारे मोठे संकेत दिले आहे. प्रसारमाध्यमांशी बोलत असताना विधानसभेचे आमदार संपर्कात आहेत का? असा प्रश्न पत्रकारांनी विचारल्यावर शिंदे म्हणाले, आज सगळं सांगितलं तर ब्रेकिंग कशी मिळेल।... अशी मिश्किल प्रतिक्रिया त्यांनी दिली.