अमर घटारे, साम टीव्ही

सरन्यायाधीश भूषण गवई यांच्या मातोश्री कमलताई गवई यांनी अमरावतीतील राष्ट्रीय स्वयंसेवक संघाच्या कार्यक्रमाला शुभेच्छा संदेश दिला. आजच्या कार्यक्रमाला कमलताई गवई यांना प्रमुख अतिथी म्हणून निमंत्रण देण्यात आलं होतं. वाद निर्माण झाल्यानंतर प्रकृतीचं कारण देत कार्यक्रमाला जाण्यास नकार दिला होता. त्यानंतर आज झालेल्या कार्यक्रमाला कमलताई गवई यांनी पत्रातून शुभेच्छा दिल्या.

कमलताई गवई यांनी लिहिलेले शुभेच्छापत्र

प्रति,

उत्सवश्री बपोरीकर

महानगर संघचालक

अमरावती

मानवी जीवन मानवतेच्या मूल्यांनी विकसित झाले असून भारतीय संस्कृती आणि सभ्यदा जगाच्या परिप्रेक्षामध्ये

सर्वोत्कृष्ट आहे. भारत हा प्राचीन कालापासून धार्मिक, सांस्कृतिक, शैक्षणिक दृष्ट्या जगाच्या शिखरावर आदर्श राहिलेला देश आहे. तथागत बुध्द,वर्धमान महावीर, सम्राट अशोक, संत कबीर,संत तुकाराम,महात्मा फुले,सावित्रीबाई फुले, महात्मा गांधी,स्वामी विवेकानंद,रामस्वामी पेरियार डॉ बाबासाहेब आंबेडकर अशा अनेक महापुरुषांनी मानवी मूल्याला विकसित करणारी थोर परंपरा भारतामध्ये निर्माण केली आहे.

डॉ. बाबासाहेब आंबेडकर यांनी समता, स्वातंत्र्य, बंधुता न्याय आणि वैज्ञानिक दृष्टिकोन धर्मनिरपेक्षता यांच्या आधारावर भारतीय संविधानाची उभारणी केली ती आज भारतात आणि भारतीय नागरिकांना विकासाकडे घेऊन जात आहे.

भारत हा सामाजिक सांस्कृतिक भावी भाषिक दृष्ट्या वैद्यने नटलेला देश असून आजपर्यंत लोकशाही मूल्यांना केंद्रावरती ठेवून त्याची विकासाकडे वाटचाल चालू आहे. भारताला आपल्याला एकजीव व सक्षम असे राष्ट्र म्हणून निर्माण करायचे आहे. म्हणून समता, स्वातंत्र्य, बंधुता, न्याय, वैज्ञानिक दृष्टिकोन धर्मनिरपेक्ष यांच्या माध्यमातून निर्माण करता येईल.

राष्ट्रीय स्वयंसेवक संघाच्या स्वयंसेवकांनाही उपरोक्त मानवी आणि संविधानिक मूल्यांच्या माध्यमातून भारतात सक्षमराष्ट्र म्हणून विकसित करण्याची अधिक संधी आहे.

आज दिनांक ०५ ऑक्टोबर, २०२५ रोजी राष्ट्रीय स्वयंसेवक संघाच्या शतकोत्तर पूर्ती वियाजयंती उत्सव संपन्न होत असून सदर कार्यक्रमास मी काही अपरिहार्य कारणास्तव उपस्थित राहू शकत नाही. या कार्यक्रमासाठी माझ्या मनःपूर्वक शुभेच्छा.

संपूर्ण मंगलमैत्री सह..

(डॉ. कमल रा. गवई)