जालना: काही दिवसापूर्वी आरोग्य विभागाच्या परीक्षांमध्ये गैरप्रकार झाल्याने परीक्षा रद्द करण्यात आली होती. ही भरती प्रक्रिया पुन्हा सुरु करण्यात यावी अशी मागणी विद्यार्थ्यांनी केली होती. यावर आज आरोग्य मंत्री राजेश टोपे यांनी प्रतिक्रीया दिली. लवकरच ही भरती प्रक्रिया सुरु होणार आहे. या परीक्षा संबंधी मुख्यमंत्री आणि उपमुख्यमंत्र्यांशी चर्चा झाली आहे, लवकरच या परीक्षा होणार असल्याचे टोपे (Rajesh Tope) यांनी सांगितले.

आज जालना येथे बोलताना राजेश टोपे यांनी आरोग्य विभागाची परीक्षा लवकरच होतील असे स्पष्ट केले. आरोग्य विभागाच्या गट क, व गट ड रिक्त पदांसाठी आरोग्य विभागाचे अधिकारी आणि मुख्यमंत्री, उपमुख्यमंत्री यांच्याशी चर्चा झाली असल्याची माहिती आरोग्य मंत्री राजेश टोपे यांनी दिली. या रिक्त पदांसाठी त्वरित भरती प्रक्रिया राबवण्यात यावी. यासाठी आरोग्य विभागाच्या रामास्वामी यांच्याशी चर्चा झाली आहे.

याबद्दल त्यांना मी लेखी सूचनाही दिली असल्याचे टोपे म्हणाले. ज्यांनी परीक्षेसाठी अर्ज केलेले आहेत, त्यांच्याकडून पुन्हा परीक्षा फी घेतल्या जाणार नसल्याचेही टोपे यांनी सांगितले. तर ज्या उमेदवारांची वयोमर्यादा संपली असेल अशा उमेदवारांनासुद्धा संधी मिळावी यासाठी प्रयत्न सुरु आहेत. यासाठी लेखी सूचना केल्या असल्याची माहिती राजेश टोपे यांनी दिली. राज्यात पुन्हा आरोग्य विभागाच्या 'क' आणि 'ड' च्या परीक्षा लवकरच घेतल्या जातील असंही टोपे (Rajesh Tope) म्हणाले.