नितीन पाटणकर

Political news :

काँग्रेस सरकरची जिथे जिथे सत्ता आहे तिथे मोफत वीज दिली जाते. तीच योजना केंद्र सरकारने आज चोरली आणि आपल्या अर्थसंकल्पातून जाहीर केली, अशा शब्दांत आमदार रवींद्र धंगेकर यांनी अर्थसंकल्पावरुन भाजपवर टीकास्त्र डागलं आहे.

आज सादर झालेले बजेट हे इलेक्शन बजेट आहे. निवडणुका डोळ्यासमोर ठेवून सादर केलेले आहे. गेल्या 10 वर्षात लोकांसाठी या सरकारने काहीही केलेले नाही. केवळ मोठमोठ्या घोषणा करण्यात, गाजर दाखवण्यात हे 'गुजरात'वाले पटाईत आहेत. पण प्रत्यक्ष लोकांना ते काहीही देत नाहीत, अशी टीका धंगेकरांनी केलीये.

माध्यमांशी संवाद साधताना धंगेकरांनी पुढे म्हटलं की, गेल्या 10 वर्षात महागाई गगनाला भिडली आहे. पेट्रोल-डिझेलचे भाव दुप्पट, तिप्पट झाले आहेत. डाळीचे भाव आवाक्याबाहेर गेले आहेत. त्यामुळे सर्वसामान्य जनता भाजप सरकारला वैतागली आहे. हे सरकार पुन्हा सत्तेत आले तर येणाऱ्या काही दिवसात पेट्रोल 200 रुपयांच्या पुढे आणि गॅस 2 हजारच्या पुढे गेल्याशिवाय राहणार नाही. सर्वसामान्य माणसांच्या डोक्यावरचे छप्पर सरकारला काढायचे आहे का?, असा सवाल धंगेकरांनी आजच्या बजेटवरून उपस्थित केला आहे.

महागाईला आळा घालण्यासाठी कुठलीही तरतूद या सरकारने आजच्या अर्थसंकल्पात केली नाही. त्यामुळे सर्व सामान्य लोक आजच्या बजेटवर नाराज आहेत. ही नाराजी येणाऱ्या निवडणुकीत तुम्हाला-आम्हाला पहायला मिळेल, असं रवींद्र धंगेकर म्हणाले.