अमर घटारे, साम टीव्ही

आगामी स्थानिक स्वराज्य संस्थाच्या निवडणुकीमुळे राजकीय घडामोडींना वेग आला आहे. सर्व राजकीय पक्षांनी मोर्चेबांधणी करण्यास सुरुवात केली आहे. अनेक राजकीय पक्षांच्या नेत्यांनी बैठकांचा सपाटा लावला आहे. राजकीय घडामोडीदरम्यान अराजकीय संस्थेच्या बैठकांसाठी शरद पवार आणि अजित पवार हजर राहत असल्याचे दिसून येत आहे. यावरून राजकीय वर्तुळात चर्चांना उधाण आलं आहे. या चर्चेदरम्यान शरद पवार लवकरच अजित पवार यांच्यासोबत जातील, असा दावा आमदार रवी राणा यांनी केला आहे.

रवी राणा यांनी अमरावतीत प्रसारमाध्यमांशी बोलताना खळबळजनक दावा केला आहे. रवी राणा म्हणाले, ' आगामी काळात शरद पवार,अजित पवार, सुप्रिया सुळे हे केंद्रीय स्तरावर एकत्र झाले आहेत. शरद पवार लवकरच अजित पवारांसोबत जातील. तर सुप्रिया सुळे या केंद्रामध्ये मंत्री दिसतील. पंतप्रधान नरेंद्र मोदी यांचं काम पाहून सुप्रिया सुळे सुद्धा केंद्राला ताकदीने पाठिंबा देतील'.

रवी राणा यांनी ठाकरे बंधूंच्या मोर्चावरही टीका केली. 'मराठी माणसांविषयी प्रेम आता येत आहे. महाराष्ट्रातील प्रत्येक माणूस मराठी माणसांसोबत उभा आहे. त्यामुळे उद्धव ठाकरे यांनी ही नौटंकी थांबवावी. तर मुंबई महानगरपालिका निवडणूक डोळ्यांसमोर ठेवून मराठीचा मुद्दा समोर केला जात आहे.

'मुख्यमंत्री बनण्यासाठी काँग्रेसच्या दरबारात उद्धव ठाकरे गेले, अशीही टीका रवी राणा यांनी केली.