भरत मोहळकर, साम टीव्ही, प्रतिनिधी

2 मर्सिडीज द्या आणि पदं घ्या असा आरोप मातोश्रीवर करणाऱ्या नीलम गोऱ्हेंच्या विरोधात थेट रश्मी वहिनीच मैदानात उतरल्या आहेत. त्यांनी ठाकरे गटाची महिला आघाडी अ‍ॅक्टिव्ह करत मुंबई आणि पुण्यातील महिला पदाधिकाऱ्यांची मातोश्रीवर बैठक घेतलीय. या बैठकीत नीलम गोऱ्हेंच्या विरोधात रणनीती आखल्याची माहिती सुत्रांनी दिलीय आणि त्याचाच भाग म्हणून सुषमा अंधारे आक्रमक झाल्या आहेत. त्यामुळेच गोऱ्हेंनी माफी मागितली तरी त्यांची आता सुटका नाही असा इशाराच अंधारेंनी गोऱ्हेंना दिलाय.

नीलम गोऱ्हेंनी ठाकरेंच्या कार्यशैलीवर टीका केल्यानंतर पुण्यातील महिला पदाधिकाऱ्यांनी थेट नीलम गोऱ्हेंच्या घराबाहेर तीव्र आंदोलन केलं. एवढंच नाही तर गोऱ्हेंच्या विधानाचे मुंबईतही पडसाद उमटले. मुंबईतील ठाकरे गटाच्या महिला पदाधिकाऱ्यांनी मंत्रालयासमोरच्या गोऱ्हेंच्या शासकीय निवासस्थानाबाहेर आंदोलन करत निषेध व्यक्त केला. हे असं असलं तरी रश्मी ठाकरेंनी घेतलेली बैठक ही गोऱ्हेंच्या विधानाबाबत नसल्याचं स्पष्टीकरण ठाकरे गटाने दिलंय.

गोऱ्हेंच्या वक्तव्यामुळे दोन्ही शिवसेनेतील संघर्ष टोकाला जाणार हे निश्चित. मात्र गोऱ्हेंच्या वक्तव्यानंतर अ‍ॅक्टिव्ह मोडवर आलेल्या रश्मी ठाकरे आगामी काळात शिंदे गटाविरुद्ध आणखी आक्रमक होणार की गोऱ्हेंचा मुद्दा मागे पडल्यानंतर पुन्हा कोशात जाणार? हे पाहणं महत्वाचं ठरणार आहे.