Rajsthan Salsar Road Accident 3 Family Members Dead News राजस्थानातील सालासर रोडवर देवदर्शनाला जाणाऱ्या एका कुटुंबातील तिघांचा भीषण अपघातात दुर्दैवी मृत्यू झाल्याची बातमी समोर आली आहे. यात आई, वडील आणि मुलगा जागीच ठार झाला आहे. तर इतर सहा जण गंभीर जखमी असून त्यांच्यावर सध्या रुग्णालयात उपचार सुरु आहे. राजस्थानातील खाटू श्याम बाबांच्या दर्शनासाठी जात असताना हा अपघात झाला असून भाविकांवर काळानं घाला घातला आहे. जखमींना तातडीने रुग्णालयात दाखल करण्यात आले आहे.

मिळालेल्या माहितीनुसार, महादेव पारसे, कांता पारसे आणि घनश्याम पारसे अशी मृतांची नावे आहेत. पारसे कुटुंब मध्यरात्री बाराच्या सुमारास कामठी येथून उज्जैनला महाकालेश्वर दर्शनाला निघाले. दर्शन घेऊन ते ११ मार्चला राजस्थान रिगंस येथील खाटू श्याम बाबा मंदिराकडे जात असताना जयपुर मार्गावर सालासर परिसरात विरुद्ध दिशेने येणाऱ्या पिकपने जबर धडक दिली.

हि धडक इतकी भीषण होती कि, या धडकेत दोन्ही वाहनांच मोठं नुकसान झालं आहे. तर पारसे कुटुंबातील तिघांचा दुर्दैवी मृत्यू झाला असून इतर सहा जण गंभीर जखमी झाले आहेत. जखमींमध्ये चालक मनोज चिंदमवारसह आराधना पारसे, पायल पारसे , पल्लवी पारसे, पुनम पारसे, तुषार पारसे आणि पवन बागडे यांचा समावेश आहे.

सर्व जखमींना उपचारासाठी तातडीने रुग्णालयात दाखल करण्यात आले असून सध्या त्यांच्यावर उपचार सुरू आहेत. दरम्यान, अपघाताची माहिती मिळताच कामठीतील कचरीपुरा परिसरात शोककळा पसरली आहे. तर मृतदेह शवविच्छेदनानंतर कामठी येथे आणण्यात येणार असल्याची माहिती आहे.