महाराष्ट्राच्या राजकारणात खळबळ उडवून देणारी ऑडिओ क्लिप व्हायरल होत आहे. मनोज जरांगे पाटील यांनी भर पत्रकार परिषदेत 32 मिनिटांची ऑडिओ क्लिप ऐकवली. यामध्ये जरांगे यांना श्रीकांत शिंदेंकडून 500 कोटी पोहोचले आहेत, असे धक्कादायक संभाषण आहे. यामुळे महायुतीमध्ये देखील आरोप प्रत्यारोप होताना दिसून येत आहे. यावर आता मनसे अध्यक्ष राज ठाकरे यांनी एक्सवर पोस्ट करत प्रतिक्रिया दिली आहे.

राज ठाकरे यांनी आपल्या पोस्टमध्ये म्हटले आहे की, सध्या राज्यात एक 'फ्रेंडशिप फाईल' ऑडिओ क्लिप व्हायरल होत आहे. ही क्लिप जवळपास 29 मिनिटांची असल्याचे ते म्हणाले. या क्लिपमध्ये भारतीय जनता पक्षाचे काही पदाधिकारी, सोशल मीडियात महत्वाची भूमिका बजावणारे व्यक्ती, राष्ट्रीय स्वयंसेवक संघाचे ज्येष्ठ पदाधिकारी आणि राजकीय विश्लेषक म्हणून ओळखले जाणारे काही युट्युब प्रभावक यांच्यातील कथित संभाषण असल्याचा दावा त्यांनी केला आहे.

या संभाषणात 500 कोटींच्या कथित व्यवहाराचा उल्लेख, माध्यमांवर दबाव कसा आणायचा आणि सरकार अडचणीत आल्यास लोकांचे कसे दुसरीकडे वळवण्यासाठी धार्मिक ध्रुवीकरणाचा मुद्दा कसा पुढे आणायचा, यासंदर्भात चर्चा असल्याचे राज ठाकरे यांनी म्हटले आहे. या क्लिपमधील दाव्यांची स्वातंत्रपणे पुष्टी झालेली नसल्याचे त्यांची सत्यता तपासणे महत्वाचे आहे.

ही क्लिप बहुधा दोन वर्षांपूर्वीची असेल, तर ती आताच का समोर आली? असा सवाल मुख्यमंत्र्यांनी उपस्थित केल्याच्या पार्श्वभूमीवर राज ठाकरे यांनी ही क्लिप बाहेर कशी आली आणि ती कोणी समोर आणली, याचाही तपास होण्याची गरज व्यक्त केली आहे. खरंतर यांच्याच सरकारमधलं नेहमीप्रमाणे शहा काट’शाहाचं’ राजकारणच दिसतंय असा टोला राज ठाकरे यांनी लगावला.

महाराष्ट्राला गोल गोल फिरवू नका

फॉरेन्सिक अहवाल आणि त्यातील तांत्रिक बाबींच्या आधारे जनतेला संभ्रमात ठेवू नये, असं आवाहन राज ठाकरे यांनी मुख्यमंत्र्यांना केलं आहे. या प्रकरणात केवळ ऑडिओ क्लिपची सत्यता तपासून चालणार नाही, तर त्यात करण्यात आलेल्या आरोपांबाबतही स्पष्टता यायला हवी, असं त्यांनी म्हटलं आहे.