सचिन बनसोडे, साम टीव्ही प्रतिनिधी

अहमदनगर : अहमदनगरमधून मोठी बातमी समोर आली आहे. अहमदनगरमधील कोपरगाव तालुक्यात भीषण रेल्वे अपघाताची घटना घडली आहे. रविवारी रात्री ही अपघाताची घटना घडली आहे. कोपरगाव तालुक्यात मनमाडकडून दौंडकडे जाणाऱ्या मालगाडीचे डबे घसरल्याची घटना घडली. या अपघातात सुदैवाने कोणतीही जीविहानी झाली नसल्याची माहिती मिळत आहे.

अमदनगरमधील मनमाड-दौंड रेल्वे मार्गावर मनमाडकडून दौंडकडे जाणाऱ्या मालगाडीच्या डब्याचे चाक निसटल्यानंतर डबे घसरल्याची घटना घडली आहे. रविवारी रात्री कोपरगाव तालुक्यातील कोन्हेगाव रेल्वे स्थानकाच्या हद्दीत ही अपघाताची घटना घडली आहे. ही मालगाडी रिकामी होती, त्यामुळे या अपघातात सुदैवाने मोठी दुर्घटना घडली नाही.

रेल्वेचे डबे घसरल्यानंतर रेल्वे कर्मचारी तातडीने घटनास्थळी पोहोचले. रेल्वे कर्मचाऱ्यांनी तातडीने दुरुस्ती करण्याच्या उपायोजना युद्ध पातळीवर सुरू केल्या. मालगाडीचे डबे नेमके कशामुळे घसरले, या संदर्भात आढावा घेण्यात येत आहे.

कान्हेगाव रेल्वे स्थानकाच्या हद्दीत झालेल्या या अपघातामुळे रेल्वे गाड्यांच्या वाहतुकीवर परिणाम झाला होता. रुळावरून घसरलेला डबा बाजूला करून वाहतूक सुरळीत करण्यात आली आहे.