दिनू गावित

नंदुरबार : गांधीधाम हुन पुरी कडे जाणाऱ्या रेल्वेला नंदुरबार रेल्वे स्थानक नजीक आग लागल्याची घटना आज सकाळी घडली आहे. रेल्वेच्या पेंट्री डब्याला भीषण आग लागली होती. रेल्वे सफाई कर्मचारी सतर्कतेमुळे जीवित हानी टळली आहे. नंदूरबार रेल्वे स्टेशन वर गांधीधाम पुरी रेल्वेला भीषण आग लागल्याने सध्या आग विझवण्यासाठी शर्थीचे प्रयत्न सुरू आहेत. (Nandurbar Train Bogie Catch Fire News)

याबाबत अधिक माहिती अशी की, गांधीधाम पुरी 12993 रेल्वे सकाळी 7.50 वाजता सुरत येथून वेळेवर निघाली नंदूरबार रेल्वे स्थानकावर 10. 10 मिनिटांनी पोहचणार होती मात्र नंदूरबार रेल्वे स्थानकापासून अवघ्या दीड किमी अंतरावर पेंट्री डब्याला भीषण आग लागली.

ही बाब नागरिकांच्या लक्षात येताच त्यांनी चैन खेचत गाडी थांबविली. यावेळी पोलीस दलासह अग्निशमन दलाला पाचारण करण्यात आले.11.50 पर्यंत आग विझविण्याचे प्रयत्न शर्थीने सुरू होते स्वयंपाक बनवितांना आग लागल्याची प्राथमिक माहिती आली आहे. रेल्वे प्रशासनाच्या अधिकृत माहिती नंतरच याबाबत आगीचे कारण स्पष्ट होईल.