सचिन कदम 
रायगड : माथेरानमध्ये फिरण्यासाठी गेलेल्या एका पर्यटकाचा मृत्यु झाल्याची घटना समोर आली आहे. माथेरान येथील किंग जॉर्ज पॉईंटजवळ सुमारे ७०० ते ८०० फुट खोल दरीत छिन्नविछिन्न अवस्थेत मृतदेह आढळून आल्याने खळबळ उडाली आहे. दरम्यान मृत्युचे कारण अजुन स्पष्ट झाले नसून या बाबत माथेरान पोलिस तपास घेत आहेत.  

कर्नाटक येथील शानमुगा सुंदरम (वय ५८) असे मृत झालेल्या पर्यटकाचे नाव आहे. दरम्यान सुट्यांचा कालावधी असल्याने सुटी घालविण्यासाठी अनेक जण फिरण्याच्या निमित्ताने पर्यटनस्थळांवर जात असतात. त्यानुसार रायगड जिल्ह्यातील माथेरान येथे देखील पर्यटकांची मोठी गर्दी होत असते. अशाच प्रकारे कर्नाटकमधील शानमुग हे १५ ऑक्टोबर रोजी माथेरान येथे पर्यटनाच्या निमित्ताने आले होते.

फिरण्यासाठी गेले ते परतलेच नाही 

लॉजवर थांबले असताना दुसऱ्या दिवशी सकाळी म्हणजे १६ ऑक्टोबरला ते फिरायला बाहेर पडले होते. मात्र रात्री उशिरापर्यंत ते लॉजवर परतले नव्हते. यामुळे लॉजिंग प्रशासनाने शानमुग सुंदरम हे पर्यटक बेपत्ता झाल्याची तक्रार माथेरान पोलिस ठाण्यात दाखल केली होती. यानंतर पोलीस प्रशासनाने तपासाला सुरवात केली होती. तर फिरण्याच्या मुख्य पॉइंटवर देखील त्यांची शोधाशोध सुरु झाली होती. 

तीन दिवसांनी आढळला मृतदेह 

तपासा दरम्यान शानमुग सुंदरम यांचा मृतदेह छिन्नविछिन्न अशा अवस्थेत किंग जॉर्ज पॉईंट जवळील खोल दरीत सापडून आला. मृतदेहासोबत असलेल्या ओळख पत्रावरून ओळख पटली आहे. स्थानिक नागरीक, हेल्प फाऊंडेशन, खोपोली आणि डेला ॲडव्हेंचर टिमने शोधकार्य केले. दरम्यान मृत्यूचे कारण अद्याप स्पष्ट झाले नसून या प्रकरणी पोलीस प्रशासनाकडून तपास सुरु आहे.