सचिन कदम 
रायगड : अधिकारी असल्याचा बनाव करत फसवणूक केल्याचे अनेक प्रकार समोर आले आहेत. असाच प्रकार रायगड जिल्ह्यातील रोहा येथे समोर आला आहे. आयडी कार्ड दाखवून घरात प्रवेश केला. यानंतर तपासणी देखील केली. मात्र या तोतया इन्कमटॅक्स अधिकाऱ्यांवर कारवाई करण्यात आली आहे. 

रायगड (Raigad) जिह्यातील रोहा शहरातील हि घटना असून नागरीकांच्या सतर्कतेमुळे हे तोतया इन्कमटॅक्स अधिकारी गजाआड केले आहेत. आपण इन्कम टॅक्स अधिकारी आहोत; अशी बतावणी करत पाच जण रोहा शहरात फिरत होते. या दरम्यान हे पाचही जण शहरातील आसिफ अन्सारी यांच्या घरात शिरले. आयडी दाखवून त्यांनी घरात प्रवेश केला. मात्र अनावश्यक चौकशी आणि संशयास्पद आयडी कार्ड यामुळे अन्सारी यांना संशय आला. त्यानंतर अन्सारी यांनी पोलिसांना फोन लावत सर्व प्रकार सांगितला. 

घडलेल्या प्रकाराबाबत (Police) पोलिसांना माहिती मिळताच पोलीस दाखल झाले. दरम्यान तीन जणांना पकडण्यात यश आले. तर दोन जण फरार झाले. फरार झालेल्या दोघांचा शोध सुरु असून पकडलेल्या तीन जणांचे आयकार्ड, मोबाईल फोन रोहा पोलिसांनी ताब्यात घेतले असून या तिघांविरोधात गुन्हा दाखल करून अटक करण्यात आली आहे.