अहिल्यानगर जिल्ह्यातील राहुरी विधानसभा मतदारसंघाचे आमदार शिवाजीराव कर्डिले यांचे काही दिवसांपूर्वी निधन झाले होते. त्यामुळे राहुरी विधानसभा मतदारसंघाची जागा रिक्त झाली होती. आज निवडणूक आयोगाने राहुरी मतदारसंघाच्या पोट निवडणुकीची घोषणा केली आहे.

तर आम्हीही निवडणूक लढायला तयार आहोत; देवेंद्र फडणवीस

बारामती आणि राहुरी पोटनिवडणूकीबाबत बोलताना देवेंद्र फडणवीस यांनी स्पष्ट केले आहे की बारामती आणि राहुरी या दोन्ही पोटनिवडणुका या बिनविरोध व्हाव्यात असा आमचा प्रयत्न असेल. पण जर आमच्यावर जर निवडणूक लादली गेली तर आम्हीही निवडणूक लढायला तयार आहोत असे देवेंद्र फडणवीस म्हणाले.

राहुरी मतदारसंघात पोटनिवडणुकीचा कार्यक्रम जाहीर झाला असुन पुढील महिन्यात २३ एप्रिल रोजी मतदान होणार असून या ठिकाणी महायुती विरुद्ध महाविकास आघाडी मध्ये होण्याची शक्यत असून महायुती मधील भाजपकडे ही जागा असल्याने भाजपच्या वतीने स्व.आमदार शिवाजी कर्डिले यांचा मुलगा अक्षय कर्डिले यांच्या नावाची चर्चा आहे, तर महाविकासआघाडीचा उमेदवार म्हणून प्राजक्त तनपुरे यांचे नाव घेतले जात आहे. मात्र या ठिकाणी भाजपाचे उमेदवार म्हणून निवडणुकीला अक्षय कर्डिले सामोरे जातील आणि निश्चित निवडणून येतील असा विश्वास राष्ट्रवादी काँग्रेस अजित पवार गटाचे आमदार संग्राम जगताप यांनी व्यक्त केला आहे.

तर निवडणुकीला आम्ही सज्ज आहोत गेल्या तीस वर्षांपासून जनतेने स्व.शिवाजी कर्डिले यांना मताच्या रूपाने जे आशीर्वाद दिले आहे त्याच प्रमाणे राहुरी मतदारसंघातील मतदार आपल्या पाठीशी उभे राहतील असा विश्वास अक्षय कर्डिले यांनी व्यक्त केला आहे. त्यामुळे येणाऱ्या निवडणुकीत काय चित्र पाहायला मिळते हे पाहणे महत्वाचे ठरणार आहे.