विधान परिषद निवडणुकीच्या पार्श्वभूमीवर राज्यात मोठ्या घडामोडी घडताहेत. महायुतीत पुणे शिक्षक मतदारसंघात भाजपनंतर शिंदेसेनेनंही स्वतंत्र उमेदवार उभा केलाय. तर दुसरीकडे, चर्चासत्र देखील सुरू आहे. मात्र, काँग्रेसच्या दाव्यानं राजकीय वर्तुळात खळबळ उडालीये. त्यामुळे पुण्यात निवडणुकीआधीच महायुतीत कशी चुरस रंगलीये?, पाहूयात या रिपोर्टमधून.

विधान परिषदेच्या पाचही जागांवर महायुती आणि महाविकास आघाडीत बंडखोरी उफाळून आलीये. मात्र सर्वाधिक चर्चेची ठरलीय ती पुणे शिक्षक मतदारसंघाची जागा. कारण या जागेवरून महायुतीतली फूट उघड झाली. कारण पुणे शिक्षक मतदारसंघात भाजपनं कौस्तुभ गावडेंना मैदानात उतरवल्यानंतरही शिंदेसेनेनं आपला स्वतंत्र उमेदवार उभा केला.

उपमुख्यमंत्री एकनाथ शिंदेंनी ही निवडणूक प्रतिष्ठेची करत थेट त्यांचे ओएसडी मंगेश चिवटे यांनी उमेदवारी जाहीर केली. मंत्री उदय सामंतांच्या उपस्थितीत मंगेश चिवटेंनी उमेदवारी अर्ज दाखल केला. त्यामुळे पुण्यात महायुतीत घमासान होण्याची चिन्हे आहेत. पुण्याच्या जागेवर दावा ठोकताना एकनाथ शिंदेंनी निवडणूक होईपर्यंत सस्पेन्स वाढवलाय.

तर मुख्यमंत्र्यांनी अजूनही चर्चेची दारं खुली असल्याचे संकेत दिले आहेत. तर दुसरीकडे, पुणे शिक्षक निवडणुकीच्या पार्श्वभूमीवर काँग्रेसनं महायुतीतील नेत्यांना डिवचलंय. मुख्यमंत्री आणि उपमुख्यमंत्र्यांमध्ये कोल्डवॉर सुरू असल्याचा दावा विजय वडेट्टीवारांनी केलाय.

पुणे शिक्षक मतदारसंघात अनेक जण रिंगणात असले तरी शिंदेंनी ही निवडणूक प्रतिष्ठेची केल्यामुळे भाजप विरूद्ध शिंदेसेना असं स्वरूप या लढतीला आलंय. मात्र उमेदवार मागे घेण्याची मुदत ९ ऑक्टोबरपर्यंत असल्यामुळे आणखी काय खलबतं होणार? शिंदेसेना माघार घेणार की भाजप? महायुतीत कोण कोणाचा गेम करणार? याकडे राज्याचं लक्ष लागलंय.