सचिन जाधव, साम टीव्ही

पुणे: राज्यामध्ये ठिकठिकाणी रोजच अपघाताची मालिका सुरूच आहे. सातारा-पुणे महामार्गावर भीषण अपघात झाला असून यामध्ये पाच ते सहा वाहन एकमेकांना धडकले आहे. या अपघातात तीन ते चार जण जखमी झाल्याची प्राथमिक माहिती आहे. घटनेची माहिती मिळताच पोलीस घटनास्थळी दाखल झाली आहेत. जखमीना उपचारासाठी रुग्णालायत दाखल केले जात आहे.

दरम्यान पुणे बंगळूर महामार्गावर एका डंपरने चार ते पाच वाहनांना धडक दिल्याने मोठा अपघात झाला आहे. मिळालेल्या माहितीनुसार, पुणे-बंगळूर महामार्गावर कात्रज येथील जांभुळवाडी बोगदाजवळ एका डंपरने चार ते पाच वाहनांना मागच्या बाजूनेजोरदार धडक दिली आणि पुढे जाऊन डंपरने पेट घेतला. यामध्ये काहीवेळातच डंपर जळून पूर्णपणे खाक झाला. मात्र डंपरने वाहनांना धडक दिल्याने आतमध्ये बसलेले चार ते पाच जण जखमी झाले आहे. यामध्ये वाहनांचे मोठे नुकसान झाले असून पोलीस आणि अग्निशमन दल घटनास्थळी दाखल झाले आहेत.

जांभूळवाडी बोगदा, नवले ब्रिज आणि वडगाव ब्रिज या ठिकाणी नेहमची अपघात सत्र सुरूच असतात. यामध्ये अनेक जणांनी आपले प्राण गमवले आहे. काही दिवसांपूर्वीच नवले ब्रीजवर एका चार चाकी वाहनाला कंटेनरने धडक दिल्याने सात जणांचा मृत्यू झाला होता. मागच्या काही दिवसांपासून या महामार्गावर किरकोळ अपघात तर रोजच होत आहे. भीषण अपघाताने अनेकांचे जीव गेले असून प्रशासन कुठलेही ठोस पाऊल उचलत नसल्याने प्रवाशांनी संताप व्यक्त केला आहे.