बालाजी सुरवसे

Maratha Aarakshan News:

आरक्षणाच्या मुद्द्यावरून मराठा व ओबीसी समाजाने आक्रमक भूमिका घेतल्या आहेत. असे असले तरी या दोन्ही समाजात मी मध्यस्थी करण्यास तयार आहे, असं वक्तव्य वंचित बहुजन आघाडीचे अध्यक्ष प्रकाश आंबेडकर यांनी केलं आहे.

मनोज जरांगे पाटील यांचं आंदोलन सर्वसामान्य मराठ्यांचं असून त्यांनी सरकारला जेरीस आणलं आहे. त्यांनी लोकसभा निवडणुकीपर्यंत निजामी मराठे यांच्यापासून सावध राहायला हवं. ते घात करतील, असा सल्ला प्रकाश आंबेडकर यांनी मनोज जरांगे यांना दिला आहे.

जरांगे पाटलांच्या आंदोलनावर बोलताना प्रकाश आंबेडकर पुढे म्हणाले की, मनोज जरांगे ज्या आंदोलनात चालतात, त्या आंदोलनात त्यांनी मोजकी लोकं सोडून सामान्य लोकात जेवण केलं पाहिजे.

पंतप्रधान नरेंद्र मोदींवर हल्लाबोल

भारत देशात धर्माचा प्रचार प्रसार करायला पाहिजे. पण त्या अगोदर आपण कुठल्या पदावर आहोत हे पाहायला हवे. रामाची प्राणप्रतिष्ठा करायला विरोध नाही. पण पंतप्रधान नरेंद्र मोदी यांनी ती प्राणप्रतिष्ठा करण्याअगोदर आपल्या पंतप्रधान पदाचा राजीनामा देऊन प्राणप्रतिष्ठा करायला हवी होती. पण आपले पंतप्रधान पद जाईल या भीतीपोटी त्यांनी पदावर राहूनच मूर्तीची प्राणप्रतिष्ठा केली असल्याची टीका प्रकाश आंबेडकर यांनी केली आहे.

रोहित पवारांनाही दिला सल्ला

आपण काही केलं असेल तर घाबरू नका. आपली संपत्ती जाहीर करा, असं मत देखील प्रकाश आंबेडकर यांनी रोहित पवार यांच्या ईडी कारवाईवरून व्यक्त केले आहे. प्रकाश आंबेडकर हे आज धाराशिव येथे आले असता पत्रकारांशी संवाद साधताना त्यांनी असं म्हटलं आहे.