मुंबई : राज्य मंत्रिमंडळ विस्ताराबाबत चर्चा सुरु असताना आता एक मोठी बातमी समोर येत आहे. मंत्रिमंडळ विस्तारादरम्यान मंत्रिमंडळात फेरबदलाची शक्यता आहे. मंत्रिमंडळातील तीन मंत्र्यांना डच्चू मिळण्याची शक्यता वर्तवली जात आहे.

शिंदे-फडवणवीस सरकारला सत्ता स्थापन करुन सात महिने होणार आहेत. सत्ता स्थापनेपासूनच शिंदे-फडणवीस सरकारवर केंद्रीय गृहमंत्री अमित शाह यांचं बारीक लक्ष आहे. राज्यातील मंत्र्यांच्या कामाचा आढावा ते सातत्याने घेत होते. मात्र तीन मंत्र्यांच्या कामावर अमित शाह नाराज असल्याची माहिती सूत्रांकडून मिळत आहे. त्यामुळे या मंत्र्यांना मंत्रिपदाला मुकावं लागू शकतं.  (Latest Marathi News)

गृहमंत्रालयाची सूत्रं, मतदारसंघातून मिळणारी माहिती आणि पक्षातील यंत्रणेकडून मिळणारी माहिती याआधारे अमित शाह याबाबत निर्णय घेण्याची शक्यता आहे. तीन मंत्र्यांच्या काही तक्रारी अमित शाह यांच्यापर्यंत गेल्या होत्या.

अमित शाहांनी त्याआधारे त्यांना काही प्रश्न विचारले होते. त्यावर मंत्र्यांनी दिलेल्या उत्तरांवर अमित शाह यांचं समाधान होते की नाही? यावर या तीन मंत्र्यांचं मंत्रिपद अवलंबून आहे. मात्र हे तीन मंत्री कोण आहेत याबाबत अद्याप कोणतीही माहिती समोर आलेली नाही.