पंतप्रधान मोदींनी पुन्हा एकदा लाल किल्ल्यावरून वन नेशन वन इलेक्शनचा नारा दिला. त्यानंतर दुसऱ्या दिवशी निवडणूक आयोगानं जम्मू-काश्मीर आणि हरियाणा विधानसभेच्या निवडणुका जाहीर केल्या. मात्र यातून महाराष्ट्र आणि झारखंडला वगळण्यात आलं. दरवेळी या चार राज्यांच्या निवडणुका सोबत घेतल्या जातात. त्यामुळे विरोधकांना आयतं कोलित मिळालं.

वन नेशन वन इलेक्शनसाठी आग्रह धरणारे पंतप्रधान चार राज्यांच्या निवडणुका एकत्र घेऊ शकत नाहीत असा टोला शरद पवारांनी मोदींना लगावलाय. तर मोदी लाल किल्ल्यावरून खोटं बोलत असल्याचा घणाघात संजय राऊतांनी लगावलाय.

देशात लोकसभा आणि विधानसभा निवडणुका एकाच वेळी घेतल्याने निवडणुकीवरील खर्च कमी होणार आहे. आचारसंहितेमुळे विकासकामांवरही परिणाम होत असल्याचा दावा भाजप वारंवार करतं. जगातील अनेक देशांमध्ये एकाच वेळी निवडणुका होतात

स्वीडनमध्ये, दर चार वर्षांनी सार्वत्रिक निवडणुकांसोबत राज्य आणि जिल्हा परिषदांच्या निवडणुका घेतल्या जातात. दक्षिण आफ्रिकेत सार्वत्रिक निवडणुका आणि राज्यांच्या निवडणुका एकाच वेळी होतात. ब्राझील, फिलीपिन्स, बोलिव्हिया, कोलंबिया, कोस्टा रिका, ग्वाटेमाला, गयाना आणि होंडुरास या देशांमध्येही एकाचवेळी निवडणुका होतात.

लोकसभा निवडणुकीत महाराष्ट्रात पिछेहाट झाल्यानं महायुतीनं धसका घेतलाय. त्यामुळे निवडणूक लांबवण्याचा घाट घातला जातोय, असा आरोप होतोय. मात्र यामुळे वन नेशन वन इलेक्शनचा नारा देणा-या भाजपला घेरण्याची आयती संधी विरोधकांना मिळाली.