पिंपरी चिंचवड : पंतप्रधान आवास योजनेत पीएसआरडीएने घर बांधली आहेत. या योजनेंतर्गत बांधलेल्या योजनेत घर मिळवून देण्यासाठी एजंट सक्रिय झाले आहेत. अशाच एका एजंटने पिंपरी चिंचवड शहरातील अनेकांना गंडा घातल्याचे समोर आले आहे. घर मिळवून देण्यासाठी शेकडो नागरिकांची कोट्यवधी रुपयांची आर्थिक फसवणूक केल्याची धक्कादायक माहिती समोर आली आहे. 

पंतप्रधान आवास योजने अंतर्गत पीएसआरडीएने पिंपरी चिंचवड शहरातील वेगवेगळ्या परिसरात हजारो घर बांधली आहेत. या घरांची सोडत ऑनलाईन लॉटरी पद्धतीने काढण्यात येत असते. घर बांधकाम होत असतानाच याठिकाणी एजंट सक्रिय झाले आहेत. या एजंटांचे अधिकाऱ्यांशी लागेबांधे असतात. अशाच प्रकारे अधिकाऱ्यांशी संगनमत करून महिला एजंट जया ढाके हिने अनेकांची फसवणूक केल्याचे समोर आले आहे. 

शेकडो नागरिकांकडून घेतले पैसे 

पीएसआरडीएच्या अधिकाऱ्यांशी संगनमत करून तुम्हाला घर मिळवून देते असं आमिष दाखवून जया ढाके ह्या एजंट महिलेने शेकडो नागरिकांकडून रक्कम घेतली आहे. यातून कोट्यावधी रुपयाची फसवणूक केली आहे. यात कुणाकडून दोन लाख तर कुणाकडून चार लाख रुपये अशी रोख रक्कम तसेच ऑन लाईन रक्कम घेऊन जया ढाके हिने नागरिकांना लुबाडला आहे. असे करत सदर महिला एजंटने मोठे घबाड जमा केले आहे.  

महिलेविरोधात पोलिसात गुन्हा दाखल 

दरम्यान हा प्रकार काहींच्या लक्षात आला. पैसे देऊन घर मिळत नसल्याने फसवणूक झालेल्या नागरिकांनी आता पिंपरी पोलीस स्टेशनमध्ये धाव घेतली आहे. या नागरिकांनी जया ढाके विरोधात गुन्हा दाखल करून तिला तात्काळ अटक करण्यात यावी अशी मागणी फसवणूक झालेल्या नागरिकांनी केली आहे.