पिंपरी चिंचवड : निगडी प्राधिकरण येथील एका ज्येष्ठ नागरिकाच्या बंगल्यात पाच ते सहा दरोडेखोरांनी प्रवेश केला. यानंतर एका महिलेच्या मदतीने दरोडा टाकण्यात आला होता. हि घटना १९ जुलैच्या रात्री दहा वाजताच्या दरम्यान घडली होती. या प्रकरणी पोलिसांनी तपास करत दरोडा टाकणाऱ्या राजस्थान येथील दोघांना ताब्यात घेतले आहे. या प्रकरणी अजून तपास सुरु आहे. 

पिंपरी चिंचवड शहर परिसरातील निगडी प्राधिकरण येथे टाकण्यात आलेल्या दरोड्याने परिसरात खळबळ उडाली होती. दरम्यान दरोडेखोरांनी ज्येष्ठ नागरिकाला त्याच्याच बंगल्यात दोरीने बांधून ठेवले. यानंतर दरोडेखोर घटना स्थळावरून पर राज्यात पसार झाले होते. पोलिसांना मोबाईल लोकेशन मिळू नये; म्हणून दरोडेखोरांनी या गुन्ह्यात वॉकी टॉकीचा वापर केला होता. या प्रकरणी पोलीसात तक्रार दाखल करण्यात आली होती. 

२०० सीसीटीव्ही फेटेज तपासून लावला शोध 

मात्र पिंपरी चिंचवड शहर पोलिसांच्या मालमत्ता विरोधी गुन्हे पोलीस शाखेने जवळपास २०० सीसीटीव्ही फुटेज तपासले. फुटेजच्या आधारे दरोडेखोरांचा मग घेतला. यानंतर दरोड्याच्या गुन्ह्यातील दोन राजस्थानी दरोडेखोरांना बेड्या ठोकल्या आहेत. सुरेश लादुराम ढाका (वय २९) आणि महिपाल रामलाल बिश्नोई (वय १९) या दोन सराईत दरोडेखोरांना पोलिसांनी बेड्या ठोकल्या आहेत. तर अन्य आरोपी अद्याप फरार आहेत. 

दोघांवर आतापर्यंत २१ गुन्हे दाखल 

दरम्यान पोलिसांनी बेड्या ठोकलेले दोन्ही आरोपी हे रेकॉर्डवरील सराईत गुन्हेगार आहे. यापूर्वी त्यांच्या विरोधात खुनाचा प्रयत्न, जबरी चोरी असे जवळपास २१ गंभीर गुन्हे दाखल आहेत. या दोन्ही आरोपींच्या ताब्यातून पोलिसांनी जवळपास सहा लाख पंधरा हजार रुपयांचा मुद्देमाल जप्त केला आहे. तर या गुन्ह्यातील उर्वरित आरोपींचा शोध पोलीस घेत आहेत.