सिद्धेश म्हात्रे

पनवेल : पनवेल तालुक्यातील शिरढोण येथील वेयर हाऊस मधील कस्टम विभागाने कारवाई करत जप्त केलेला माल ठेवण्यासाठी भाड्याने गोडाऊन घेतले आहे. भाड्याने घेतलेल्या गोडाऊनमध्ये ठेवलेल्या मालावरच दरोडा टाकण्यात आला आहे. याठिकाणी उभ्या करण्यात आलेल्या ट्रकमधून ३० ते ३५ दरोडेखोरांनी दरोडा टाकत तब्बल ५० टन सुपारी आणि मिरी हा माल चोरी केल्याची धक्कादायक घटना समोर आली होती. 

पनवेलच्या कस्टम विभागाकडून कस्टम ड्युटी न भरल्याने गोडाऊनमध्ये हा सर्व माल ठेवण्यात आला होता. याठिकाणी मोठ्या प्रमाणात माल आणून ठेवण्यात आलेला असतो. दरम्यान सदरच्या गोडाऊनमध्ये रात्रीच्या वेळी सुमसाम असल्याची संधी साधत चोरट्यांनी दरोडा टाकला आहे. ट्रकमध्ये असलेला सुमारे ५० टन सुपारी व मिरी चोरट्यानी लंपास केली आहे. हा प्रकार लक्षात आल्यानंतर पोलिसांनी सीसीटीव्ही फुटेज तपासून शोध सुरु केला. 

१ कोटी ८० लाखाचा माल जप्त 

याप्रकरणी पनवेल शहर पोलीस ठाण्यात गुन्हा दाखल करण्यात आला होता. तर पोलिसांनी तपासाला गती देत भिवंडी येथून एका आरोपीला ताब्यात घेतले आहे. त्याच्याकडून सुमारे १ कोटी ८० लाख रुपये किंमतीची सुपारी आणि मिरी हा माल रिकव्हर करण्यात आला आहे. तर आणखी चोरट्यांचा शोध पोलिसांकडून सुरु करण्यात आला आहे.  

मुख्य सूत्रधार फरार 

दरम्यान पोलिसांनी एका आरोपीला अटक करण्यात आली असली तरी या घटनेचा सूत्रधार अद्याप फरार असून शहरात एवढा मोठा दरोडा पडला असल्याने पोलीसांच्या कामगिरीवर प्रश्नचिन्ह उपस्थित करण्यात येत आहे. तर याच गोडाऊनमध्ये तिसऱ्यांदा चोरीची घटना घडल्याने कस्टम अधिकाऱ्यांच्या कामगिरीवर देखील प्रश्नचिन्ह उपस्थित करण्यात येत आहे.