पंढरपूर : गुढीपाडवा ते मृग नक्षत्रपर्यंत विठ्ठल रुक्मिणी मातेला करण्यात येणाऱ्या चंदन उटी पूजेतून मंदिर समितीला १४ लाख रुपयांचे उत्पन्न मिळाले आहे. दरवर्षी मृग नक्षत्रापर्यंत होणारी पूजा यंदा येत्या १३ जूनला पूजेची सांगता होणार आहे. दरम्यान ३० मार्चपासून सुरु झालेल्या चंदन उटी पूजेसाठी सुमारे ५३ किलो सुगंधित चंदनाचा वापर करण्यात आला आहे. याला भाविकांचा देखील तितकाच प्रतिसाद मिळाला आहे. 

उन्हाळ्यातील तीव्र उष्णतेपासून विठ्ठल रुक्मिणीचे संरक्षण व्हावे. शिवाय उष्णतेचा दाह कमी होऊन देवाला थंडावा मिळावा यासाठी दरवर्षी चंदन उटी पूजा केली जाते. देवाची चंदन उटी पूजा करण्यासाठी भाविकांची मोठी मागणी असते. त्यासाठी ऑनलाईन बुकिंग केली जात असते. यावर्षी ३० मार्च गुढीपाडव्याच्या दिवसापासून चंदन उटी पूजा सुरु झाली. साधारण मृग नक्षत्रा पर्यंत पूजा केली जाते. या दरम्यान शुभदिवस पाहून पूजेची सांगता केली जाते.

पूजेतून मंदिर समितीला १४ लाखांचे उत्पन्न
यंदा ३० मार्च ते १२ जून दरम्यान चंदन उटी पूजा करण्यात येत आहे. या ४३ दिवसांमध्ये विठ्ठल रुक्मिणीच्या चंदन उटी पूजेतून सुमारे १४ लाख रुपयांचे उत्पन्न मिळाले आहे. विठ्ठलाच्या चंदन उटी पूजेसाठी २१ तर रुक्मिणीच्या पूजेसाठी ९ हजार रुपये देणगी मूल्य आकारण्यात आले. त्यानुसार ४३ दिवसांमध्ये चंदन उटी पूजेच्या माध्यमातून विठ्ठल मंदिर समितीला १४ लाख रुपये देगणी रुपाने मिळणार आहेत. याशिवाय चंदन उटी पूजेसाठी सुमारे ५३ किलो ७५० ग्रॅम इतके सुवासिक चंदनाचा वापर करण्यात आला.  

१३ जूनला होणार समाप्ती 
चंदन उटी पूजेसाठी सर्व दिवसांची बुकिंग झाली आहे. त्यानुसार १३ जून हा दिवस शुभ असल्याने या दिवशी विठ्ठल रुक्मिणी मातेच्या चंदन उटी पूजेची सांगता होणार आहे. १३ जूनला अनेक वर्षातून सिध्दी योग आला आहे. शिवाय हा दिवस सकारात्मकता आणि दयाळूपणा दर्शवतो. त्यामुळे देवाच्या चंटन उटीपूजेसाठी या शुभ दिवसाची निवड करण्यात आल्याचेही मंदिर समितीच्या वतीने सांगण्यात आले.