पंढरपूर : आषाढी यात्रेच्या निमित्ताने भाविकांची गर्दी वाढती आहे.  लांब रांगा लागत असून आलेल्या भाविकांना लवकर दर्शन घेता यावे असे नियोजन मंदिर समितीने केले आहे. या दरम्यान आता आषाढी यात्रेनिमित्ताने विठुरायाचे दर्शन घेण्यासाठी असलेले व्हीआयपी दर्शन आता बंद करण्याचा निर्णय घेण्यात आला आहे. यामुळे भाविकांची दर्शन रांग लवकर पुढे सरकणार आहे.

आषाढी यात्रेनिमित्ताने (Pandharpur) पंढरपूरमध्ये भाविकांची गर्दी होत असताना देखील व्हीआयपी दर्शन सुरु होते. याबाबत साम टीव्हीने व्हीआयपी दर्शनामुळे भाविकांचे हाल अशी बातमी प्रसिद्ध केली होती. त्यानंतर आज मंदिर समितीने व्हीआयपी दर्शन बंद करण्याचा निर्णय घेतला आहे. आजपासून मंदिर समितीने व्हीआयपी दर्शन बंद करण्याचा निर्णय घेतल्यामुळे दर्शन रांगेतील (Ashadhi Wari) भाविकांना मोठा दिलासा मिळाला आहे. शिवाय दर्शन रांग देखील लवकर पुढे सरकण्यास मदत होत आहे.   

गोपाळपूर पर्यंत दर्शन रांग 

आषाढी यात्रा आजपासून विठुरायाचे २४ तास पदस्पर्श दर्शन सुरू झाले आहे. दर्शन सुरू झाल्यानंतर भाविकांची मोठी गर्दी वाढली आहे. दरम्यान आज पहिल्याच दिवशी गोपाळपूर रोडवरील पत्रा शेडपर्यंत दर्शन बारी गेली आहे. जवळपास दहा पत्रा शेडपैकी पाच पत्राशेड भाविकांच्या गर्दीने भरले आहेत. पुढील दिवसात भाविकांची आणखीन गर्दी होण्याची शक्यता देखील आहे.