पंढरपूर : वाळू माफियांची दादागिरी सुरूच असल्याचे पाहण्यास मिळत आहे. प्रशासनाच्या नाकावर टिच्चून वाळू उपसा करत आहे. दरम्यान वाळू उपसा सुरु असताना माढ्याचे तहसीलदार कारवाई करण्यासाठी गेले असता वाळू माफियांकडून त्यांना जीवे मारण्याचा प्रयत्न करण्यात आला आहे. दरम्यान तहसीलदारांनी मात्र वाळू उपशा विरोधात कारवाई केली आहे. 

चोरून नदीतील वाळूचा उपसा मोठ्या प्रमाणात केला जात आहे, प्रशासनाकडून अनेकदा कारवाई केल्यानंतर देखील वाळूचा उपसा करण्यात येत असतो. तर बऱ्याचदा कारवाई करण्यासाठी जात असलेल्या प्रशासनाच्या पथकावर वाळू माफियांकडून हल्ला करण्यात येत असल्याच्या घटना घडल्या आहेत. अशीच घटना पंढरपूरच्या माढा येथे घडली आहे. कारवाईसाठी गेलेल्या तहसीलदारावर हल्ला करण्यात आल्याचा प्रकार समोर आला आहे. 

माढ्याच्या मुंगशी गावातील सीना नदीच्या पात्रातून जेसीबीद्वारे वाळू उत्खनन करण्यात येत होते. यावेळी माढ्याचे तहसीलदार संजय भोसले यांनी कारवाई करत उत्खनन करणारे एक टाटा टिप्पर, दोन ट्रॅक्टर ट्रॉलीसह वाहनाने उत्खनन करुन वाहतूक करत असताना तहसीलदारांनी पथकाद्वारे पकडले. वाहने पकडू नयेत म्हणून वाळू माफियाने काळ्या स्क्रारपिओ गाडीने तहसीलदारांच्या गाडीला पाठीमागून धक्का देऊन रिव्हर्स गाडी चालवून कारवाईसाठी पुढे जाण्यास अडथळा निर्माण केला. याबाबत कुर्डूवाडी पोलिसांत जीवे मारण्याचा प्रयत्न केल्याचा गुन्हा नोंद करण्यात आला आहे. 

वाळू उत्खनन करणाऱ्यांवर एमपीडीए कायद्यांतर्गत कारवाई करा; मंत्री चंद्रशेखर बावनकुळे
बुलढाणा : बुलढाणा जिल्ह्यातील वाळू माफियांविरोधात महसूल मंत्री चंद्रशेखर बावनकुळे ॲक्शन मोडवर आले आहेत. अवैध वाळू उत्खनन तसेच वाहतूक करणाऱ्यांवर एमपीडीए अर्थात महाराष्ट्र धोकादायक व्यक्ती प्रतिबंधक कायद्यांतर्गत गुन्हे दाखल करा, असे स्पष्ट निर्देश त्यांनी बुलढाणा जिल्हाधिकारी आणि पोलीस अधीक्षकांना दिले आहेत. महसूल मंत्री बावनकुळे जिल्हा दौऱ्यावर असताना त्यांनी महसूल विभागाची आढावा बैठक घेतली.