भरत नागणे, साम टीव्ही, प्रतिनिधी

देशभरात काल धुळवडीचा उत्साह पाहायला मिळाला. ठिकठिकाणी लोकांनी रंग उधळून रंगाचा सण साजरा केला. पण याच दरम्यान पंढरपूरहून धक्कादायक प्रकार घडला. धुलीवंदनाच्या दिवशीच पंढरपूरमध्ये विक्रीसाठी आणलेले २०८ किलो गोमांस पोलिसांनी पकडले. या घटनेमुळे परिसरात मोठी खळबळ उडाली आहे.

काल धुलीवंदनाच्या दिवशी ठिकठिकाणी मटण खरेदी करण्याची लोकांनी अनेक दुकानांसमोर गर्दी केली होती. मटण विक्री करणाऱ्या दुकानांच्या बाहेर ग्राहकांच्या रांगा लागल्या होत्या. त्याच दरम्यान पंढरपूर शहरातील आंबेडकर नगर परिसरात गोमांसाची विक्री सुरु असल्याची माहिती पोलिसांना मिळाली.

मिळालेल्या माहितीनुसार, पोलिसानी आंबेडकर नगर परिसरातल्या ठराविक ठिकाणी छापा मारला. कारवाईदरम्यान पोलिसांनी खंडू दत्तात्रय वायदंडे आणि सोहेल अस्लम कुरेशी या दोघांना ताब्यात घेतले. या दोघांकडे असलेले २०८ किलो गोमांस पोलिसांनी जप्त केले. पंढरपूर शहर पोलीस ठाण्यात दोघांच्या विरोधात गुन्हा दाखल करण्यात आला आहे.

ऐन धुलीवंदनाच्या सणाच्या दिवशी पंढरपूर सारख्या ठिकाणी गोमांस आढळल्याने मोठी खळबळ उडाल्याचे म्हटले जात आहे. या प्रकरणी पोलिसांनी दोघांना ताब्यात घेतले आहे. पण या प्रकरणातील दोन आरोपी फरार असल्याची माहिती समोर आली आहे. हे आरोपी गोमांस कुठून आणून कोणाला विकत होते याचा तपास पोलीस करत आहेत.