पंढरपूर : नवीन शैक्षणिक वर्ष सुरु होण्यास अवघा एक दिवस बाकी आहे. त्यापूर्वीच सांगोला तालुक्यातील जिल्हा परिषदेच्या शाळांवर शिक्षकांची संख्या कमी असल्या कारणाने पालकांनी गटशिक्षणाधिकारी यांच्या कार्यलायाला कुलूप ठोकले आहे. शिक्षकांची नेमणूक करण्याची मागणी यावेळी करण्यात आली. 

राज्यात शाळा सुरू होण्याचे वेध लागले आहेत. अशातच सांगोला तालुक्यातील जिल्हा परिषद शाळेत १३० शिक्षक कमी आहेत. त्यामुळे तालुक्यातील काही शाळा बंद होण्याच्या मार्गावर आहेत. शिवाय विद्यार्थ्यांचे देखील शैक्षणिक नुकसान होत असते. याच मुद्द्यावर आज (Sangola) सांगोला येथे गटशिक्षण अधिकारी कार्यालयास संतप्त पालकांनी कुलूप ठोकले. यामुळे शाळा सुरू होण्याच्या एक दिवस पूर्वी सांगोल्यात शाळांतील शिक्षकांना प्रश्न ऐरणीवर आला आहे. 

संतप्त पालकांनी गटशिक्षणाधिकारी कार्यालय गाठत गेटवर घोषणाबाजी करत (Zp School) जिल्हा परिषद शाळेवर शिक्षक मिळालेच पाहिजे; अशी मागणी करण्यात आली. तसेच याबाबत संतप्त पालकांनी माजी आमदार दिपक साळुंखे पाटील यांची भेट घेतली. या प्रसंगी माजी आमदार साळुंखे यांनी शिक्षण विभागाच्या निष्क्रियतेवर आक्षेप घेतला आहे.