उद्धव ठाकरे यांचा पक्ष दुसऱ्यांदा फुटल्याचे आता जवळपास निश्चित झाले आहे. खासदारांच्या फुटीवर पक्षाकडून व्हीप जारी करून दिल्लीत बैठक बोलवण्यात आली होती. पण या बैठकीला त्या सहा फुटीर खासदारांनी दांडी मारली. २०२२ च्या बंडखोरीनंतर ठाकरे गटाला पुन्हा एकदा लोकसभा खासदारांच्या पातळीवर मोठा राजकीय धक्का बसल्याचे बोलले जात आहे. या ६ फुटीर खासदारांना आता कायदेशीर नोटीस पाठवली जाणार असल्याची माहिती खात्रीलायक सूत्रांनी दिली.

उद्धव ठाकरेंच्या सल्ल्यानंतर दिल्लीमध्ये बोलावलेल्या महत्त्वाच्या संसदीय बैठकीला लोकसभेच्या ९ खासदारांपैकी केवळ ३ खासदार उपस्थित राहिले, तर ६ खासदार गैरहजर राहिले. लोकसभेचे खासदार अरविंद सावंत, अनिल देसाई, आणि राजाभाऊ वाजे हे तीन खासदार आणि राज्यसभेचे खासदार संजय राऊत हेच केवळ बैठकीत दाखल झाले होते.

ओमराजे निंबाळकर, संजय दिना पाटील, भाऊसाहेब वाकचौरे, संजय जाधव, संजय देशमुख आणि नागेश पाटील आष्टीकर हे ६ खासदार बैठकीला पोहोचले नाहीत आणि त्यांच्याशी संपर्कही होऊ शकलेला नाही. हे ६ खासदारांनी व्हिप धुडकावल्याचे बोलले जात आहे. या खासदारांवर हक्कभंगाची कारवाई केली जाणार असल्याची माहिती मिळाली आहे.

खासदारकी रद्द करण्याची मागणी -

दिल्लीतील या बैठकीसाठी सर्व खासदारांना व्हिप जारी करून उपस्थित राहणे बंधनकारक करण्यात आले होते. व्हिपचा निरोप ईमेल, व्हॉट्सॲप आणि फोनद्वारे प्रत्येकापर्यंत पोहोचवला गेला होता. व्हिप जारी करूनही गैरहजर राहिल्यामुळे या खासदारांवर पक्षशिस्त भंगाची कारवाई होऊ शकते. तसेच शेड्युल १० (१० वे वेळापत्रक - पक्षांतर बंदी कायदा) नुसार त्यांची खासदारकी रद्द करण्याची कायदेशीर मागणी केली जाऊ शकते.

'ऑपरेशन टायगर' यशस्वी?

शिंदे गटाकडून 'ऑपरेशन टायगर' अंतर्गत ठाकरे गटाचे खासदार फोडल्याची चर्चा आहे. जर हे ६ खासदार एकत्र असतील, तर नऊपैकी दोन तृतीयांश (२/३) बहुमताचा आकडा त्यांच्याकडे होतो. अशा स्थितीत त्यांच्यावर शेड्युल १० नुसार कारवाई टाळता येऊ शकते आणि ते स्वतंत्र गट स्थापन करू शकतात. कालपर्यंत ठाकरे गटाला विश्वास होता की काही खासदार परत येतील. तसेच, जर खासदारांनी शिंदे गटासोबत जाण्यासाठी सह्या केल्या असतील, तर ते पत्र किंवा कागदपत्रे अद्याप मीडियासमोर का आणली नाहीत, असा सवाल ठाकरे गटाकडून उपस्थित केला जात आहे.