सुशील थोरात, साम प्रतिनिधी

कोणाशी वाद झाला तर लागलीच अनेकांच्या तोंडातून शिव्या येतात. इतकेच काय साधं बोलताना सुद्धा अनेकजण आई-बहिणीवरून शिव्या देतात. पण आता मात्र लोकांच्या तोंडाला लगाम लावली जाणार आहे. अहिल्यानगरमधील एका गावातील नागरिकांनी याबाबत मोठा निर्णय घेतला आहे. आई किंवा बहिणीशी संबंधित अपशब्द वापरणाऱ्या व्यक्तींना दंड आकारण्याचा ठराव नगरच्या श्रीगोंदा येथील कोळगाव ग्रामपंचायतीने घेतला आहे.

गावातील सार्वजनिक ठिकाणी किंवा वैयक्तिक वादात आई-बहिणीचा उद्धार करून शिवीगाळ करणाऱ्यांना आळा घालण्यासाठी महिलांनी पुढाकार घेतला आहे. जो कोणी शिवी देईल, त्या संबंधित व्यक्तीला ५०० रुपये दंड ठोठावण्याचा ऐतिहासिक ठराव घेण्यात आला आहे. जागतिक महिलादिनाचे औचित्य साधत कोळगाव येथे महिलांची ग्रामसभा आयोजित करण्यात आली होती.

यात महिलांनी गावच्या सामाजिक शिस्तीसाठी अत्यंत धाडसी आणि कौतुकास्पद आणि ऐतिहासिक निर्णय घेतले. एकमेकांच्या वादात आई-बहिणीवरून शिवीगाळ करणाऱ्या व्यक्तीला ५०० रुपये दंड आकारण्याचा ऐतिहासिक ठराव या सभेत सर्वानुमते मंजूर करण्यात आला.

कोळगावात विविध जाती आणि धर्मांचे सुमारे ९००० नागरिक राहतात. गावातील अनेकांचा प्रपंच हा शेतीवर अवलंबून आहे. दरम्यान रविवारी सरकारी निर्देशांनुसार ज्येष्ठ अंगणवाडी सेविका (कार्यकर्ता) शकुंतला देशमुख यांच्या अध्यक्षतेखाली एक विशेष महिला ग्रामसभा आयोजित करण्यात आली होती. या ग्रामसभेत शेती आणि इतर क्षेत्रात उल्लेखनीय योगदान देणाऱ्या महिलांचा सत्कार करण्यात आला.

या कार्यक्रमादरम्यान पूजा जगताप यांनी आई किंवा बहिणीबद्दल अपशब्द वापरणाऱ्या गावकऱ्यांवर कारवाई करण्याचा प्रस्ताव मांडला होता, अशी माहिती सरपंच पुरुषोत्तम लगड यांनी दिली. पूजा जगताप यांनी ग्रामसभेत मांडलेल्या प्रस्तावावर चर्चा झाली असं सरपचं पुरुषोत्तम लगड म्हणाले. बराच विचारविनिमय केल्यानंतर शिवीगाळ करणारे आणि अपमानास्पद भाषा वापरणाऱ्यांवर ५०० रुपये दंड आकारण्याचा निर्णय घेण्यात आला,” असे सरपंच लगड म्हणाले.

तसेच दंड आकरण्याच्या नियमाचा गैरवापर रोखण्यासाठी डिजिटल पुरावे सादर केले जातील. त्यानंतर दंड आकारला जाईल यावर गावकऱ्यांचे एकमत झाले. "हा प्रस्ताव महिलांकडून आला असल्याने पंचायतीने त्यांना (आणि आवश्यक असल्यास, त्यांच्या मुलांना) गुन्हेगारांची ओळख पटवण्यात पुढाकार घेण्याचे आवाहन केले," असे लगड म्हणाले. तसेच आरोपीकडून गोळा केलेला दंड गावाच्या विकासासाठी वापरला जाईल अशी माहिती सरपंच पुरुषोत्तम लगड म्हणाले.