पराग ढोबळे, साम टीव्ही प्रतिनिधी

नागूपर : 'आम्हाला चौथ्यांदा सरकार येण्याची गॅरंटी नाही, मात्र रामदास आठवलेंना आहे. सरकार कोणाचे आले तरी रामदास आठवले यांचे मंत्रीपद पक्के असते, असे केंद्रीय मंत्री नितीन गडकरी गंमतीने म्हणाले. नितीन गडकरी यांच्या वक्तव्यानंतर सभागृहात एकच हशा पिकला. ते नागपुरातील एका कार्यक्रमात बोलत होते.

नागपुरात मारवाडी फाऊंडेशनर्फे देण्यात येणारा भारतरत्न डॉ. बाबासाहेब आंबेडकर पुरस्कार केंद्रीय मंत्री रामदास आठवले यांना नितीन गडकरी यांच्या हस्ते प्रदान करण्यात आला. त्यावेळी केंद्रीय मंत्री नितीन गडकरी बोलत होते. सिव्हील लाईन येथील चिटणवीस सेंटरच्या बॅनियन सभागृहात या कार्यक्रमाचे आयोजन करण्यात आलं होतं.

नितीन गडकरी पुढे म्हणाले, 'लोकसभा निवडणुकीत आमचे सरकार येऊन त्यांना मंत्री होण्याची गॅरंटी आहे. मात्र आम्हाला मात्र नाही आहे. मी गंमतीने नेहमीच म्हणत असतो. राज्य कोणाचे आले तरी रामदास आठवले यांचे स्थान पक्के आहे. त्यावेळी लालूप्रसाद यादव हे रामविलास पासवान यांना म्हणाले होते की, रामदास आठवले हे राजकीय मौसमी शास्त्रज्ञ आहेत. राजकारणात पुढे काय होणार आहे, याची सर्व माहिती आठवलेंना असते, असा किस्सा त्यांनी सांगितला.

अन् आठवले झाले तिसऱ्यांदा केंद्रीय मंत्री

काही महिन्यांपूर्वी झालेल्या लोकसभा निवडणुकीत राष्ट्रीय लोकशाही आघाडीने बाजी मारली. या निवडणुकीत राष्ट्रीय लोकशाही आघाडीने ३०० जागा जिंकल्या होत्या. तर संयुक्त पुरोगामी आघाडीनेही चांगल्या जिंकल्या. लोकसभेत ३०० जागा मिळाल्यानंतर राष्ट्रीय लोकशाही आघाडीने सत्तेवर दावा ठोकला. त्यानंतर झालेल्या शपथविधीत नरेंद्र मोदी यांच्यासहित नितील गडकरी, रामदास आठवले यांनीही केंद्रीय मंत्रिपदाची शपथ घेतली होती.