चेतन व्यास, वर्धा प्रतिनिधी

Nitesh Karale Master : नागपूर पदवीधर मतदारसंघाचे अपक्ष उमेदवार नितेश कराळे मास्तर यांची राष्ट्रवादी काँग्रेस पक्षातून हकालपट्टी करण्यात आली. त्यानंतर त्यांनी पत्रकार परिषद घेऊन बाजू मांडली. पण यावेळी बोलताना ते प्रचंड भावूक झाले. त्यांच्या डोळ्यातून अश्रूंचा बांध फुटला होता. ते ऑन कॅमेरा ढसाढसा रडले. राष्ट्रवादीने केलेल्या या कारवाईची माहिती आपल्याला माध्यमांतूनच मिळाल्याचे त्यांनी यावेळी सांगितले.

हकालपट्टीची खंत

विधानसभा आणि लोकसभा निवडणुकीच्या काळात आपण पक्षासाठी राज्यभर प्रचार केला. स्वतःच्या क्लासकडे दुर्लक्ष करून पक्षाच्या विजयासाठी आपण तब्बल ११० सभा घेतल्या. मात्र या सगळ्या मेहनतीची परतफेड पक्षानं हकालपट्टी करून केल्याची खंत कराळे यांनी व्यक्त केली. राष्ट्रवादी काँग्रेसचे सर्वेसर्वा शरद पवार यांच्याबद्दल आदर व्यक्त करत त्यांनी पक्षाच्या निर्णयाचा स्वीकार केला, परंतु ही कारवाई पूर्णपणे चुकीची असल्याचे मत त्यांनी मांडले.

शंभरहून अधिक पोलीस केसेस

सर्वसामान्यांसाठी लढा देताना आपल्यावर शंभरहून अधिक पोलीस केसेस दाखल झाल्या, दोन अॅट्रॉसिटीचे गुन्हे दाखल झाले आणि आठ दिवसांचा तुरुंगवासही भोगला. हे सर्व जनतेसाठी लढल्याचे आपल्याला मिळालेले 'बक्षीस' असल्याची भावना त्यांनी व्यक्त केली. मात्र, या बिकट परिस्थितीत किंवा तुरुंगवास भोगत असताना पक्षातील कोणत्याही मोठ्या नेत्याने साधी विचारपूसही केली नाही, अशी खंत त्यांनी बोलून दाखवली.

काँग्रेसचा दबाव असल्याचा संशय

या संपूर्ण कारवाईमागे काँग्रेस पक्षाचा दबाव असण्याची दाट शक्यता असल्याचे त्यंनी सांगितले. काँग्रेसने आपल्याला मराठवाड्यात आणि पश्चिम महाराष्ट्रात मदत न करण्याची भूमिका घेत कारवाईची मागणी केल्याची माहिती मिळाल्याचे कराळे यांनी स्पष्ट केले.

आपण नेहमीच जनतेच्या हितासाठी आणि हक्कासाठी लढलो असून, आता जनता आणि मतदारच उद्याच्या मतदानातून या अन्यायाला चोख उत्तर देतील आणि आपल्याला मोठ्या मताधिक्याने विजयी करतील, असा ठाम विश्वास नितेश कराळे यांनी व्यक्त केला आहे.