>> विजय पाटील

सांगली : नागपूर हिवाळी अधिवेशनात राष्ट्रवादीचे नेते आमदार जयंत पाटील यांच्या निलंबनाची कारवाई करण्यात आली आहे. त्यानंतर आता जयंत पाटलांच्या अडचणीत आणखी वाढ होण्याची शक्यता आहे. कारणर सांगली जिल्हा मध्यवर्ती बँकेच्या चौकशीवरील स्थगिती उठली आहे.

सहकार विभागाने सांगली जिल्हा मध्यवर्ती बँकेच्या चौकशीचे पुन्हा आदेश दिले आहेत. बँकेतील नोकर भरती, अनियम कर्जवाटप आणि गैर कारभाराविरोधात चौकशी सुरू होती. पण महाआघाडी सरकारच्या काळात चौकशीला स्थगिती देण्यात आली होती. (Latest Marathi News)

राष्ट्रवादी काँग्रेसचे प्रदेशाध्यक्ष जयंत पाटील यांच्या नेतृत्वाखाली जिल्हा बँकेत राष्ट्रवादी काँग्रेस,भाजपा खासदार गट आणि काँग्रेस यांची एकत्रित सत्ता आहे. तर राष्ट्रवादीचे ज्येष्ठ नेते आणि तत्कालीन जिल्हा मध्यवर्ती बँकेचे अध्यक्ष दिलीप पाटील यांच्या कार्यकाळात गैर कारभार झाल्याचा आरोप होता.

स्वतंत्र भारत पक्ष यांच्याकडून आणि त्यानंतर राष्ट्रवादीच्या संचालक मंडळाच्या मागणी नंतर चौकशी सुरू झाली होती. नुकतेच भाजप आमदार गोपीचंद पडळकर यांनी सहकार मंत्री अनिल सावे यांच्याकडे चौकशीवरील स्थगिती उठवून पुन्हा चौकशीची मागणी केली होती.