राष्ट्रवादी काँग्रेस पक्षाच्या पंढरपूर येथील महिला मेळाव्यात एक अनपेक्षित आणि धक्कादायक प्रकार समोर आला आहे. या मेळाव्यात काही महिलांच्या अंगात आल्याची घटना घडली आहे. सायंकाळी सुरू झालेल्या या मेळाव्यादरम्यान, देवीचं गाणं वाजवण्यात आलं होतं. यादरम्यान, काही महिला देवीच्या गाण्यावर नृत्य करत होते. मात्र, नृत्य करत असताना काही महिलांच्या अंगात आल्याची घटना घडली आहे. याचा व्हिडिओ सध्या सोशल मीडियात व्हायरल होत आहे.

पंढरपुरात राष्ट्रवादी काँग्रेस पक्षातर्फे मेळाव्याचं आयोजन करण्यात आलं होतं. उपमुख्यमंत्री अजित पवार यांच्या पत्नी सुनेत्रा पवार यांच्या उपस्थितीत हा महिला मेळावा आयोजित करण्यात आला होता. संध्याकाळी सुरू झालेल्या या कार्यक्रमात अनेक महिला मोठ्या संख्येने सहभागी झाल्या होत्या. देवीची भक्तिगीते वाजवल्यानंतर काही महिला त्या गाण्यांवर नृत्य करू लागल्या.

मात्र, याचवेळी काही महिलांच्या अंगात आल्याचा प्रकार घडला आणि त्यामुळे सभास्थळी काही काळ गोंधळाचे वातावरण निर्माण झाले.या घटनेमुळे मेळाव्याचा उद्देश मागे पडल्याचे चित्र निर्माण झाले असून, यावर विविध प्रतिक्रिया उमटू लागल्या आहेत.

राजकीय कार्यक्रमांमध्ये अशा घटनांपासून दूर राहण्यासाठी योग्य नियोजन आणि व्यवस्थापन गरजेचे आहे, असे मत काही महिला कार्यकर्त्यांनी व्यक्त केले आहे.

तसेच, सुनेत्रा पवार यांना कार्यक्रमस्थळी तब्बल दोन ते अडीच तास उशीर झाल्याने अनेक महिलांनी नाराजी व्यक्त करत कार्यक्रमातून काढता पाय घेतल्याची माहिती समोर आली आहे. या व्हायरल व्हिडिओवर सध्या विविध प्रतिक्रिया उमटत आहे.

साम टीव्ही या व्हिडिओची पुष्टी करत नाही.