जसजशी विधानसभा निवडणूक जवळ येऊ लागलीय तसतशी पुन्हा नवनवी राजकीय समीकरणं जुळतात की काय अशा हालचाली राज्यात सुरू झाल्या आहेत. याला कारण आहे अजित पवारांच्या राष्ट्रवादीचे आमदार अतुल बेनके यांनी घेतलेली शरद पवारांची भेट, ते केवळ भेट घेऊन थांबले नाहीत तर त्यांनी थेट शरद पवार आणि अजित पवार विधानसभेत एकत्र येतील असं भाकीतही वर्तवलंय. त्यामुळे पुन्हा एकदा काका-पुतणे एकत्र येणार असल्याच्या चर्चांना उधाण आलंय. अतुल बेनके म्हणाले आहे की, विधानसभेपूर्वी दादा-साहेब एकत्र येणार.

महायुतीत कोणती जागा कुणाला सुटणार याचा तिढा वाढत चालल्यानं अजित पवारांच्या राष्ट्रवादीचे आमदार अस्वस्थ आहेत का? असा प्रश्न यानिमित्तानं निर्माण झालाय. उपमुख्यमंत्री अजित पवारांनीही असाच सूर आळवलाय.

दरम्यान, अतुल बेनके हे अजित पवारांच्या राष्ट्रवादीचे जुन्नरचे आमदार आहेत. शिरूरचे खासदार अमोल कोल्हेंच्या घरी जाऊन बेनकेंनी शरद पवारांची भेट घेतली हे विशेष आहे. तोच धागा पकडून पवारांनीही ज्यांनी लोकसभेत आमच्या राष्ट्रवादीला मदत केली ते आमचे, असं सूचक विधान केलंय.

अजित पवारांच्या राष्ट्रवादीतले अनेक आमदार शरद पवारांच्या संपर्कात असल्याचा दावा पवारांच्या राष्ट्रवादीचे नेते अनेकदा करत असतात. बेनकेंनी पवारांची भेट घेतल्यामुळे याची अधिकच चर्चा रंगलीय. मात्र बेनकेंनी थेट काका-पुतणे एकत्र येणार असल्याचं भाकित वर्तवल्यामुळे पडद्याआडून काही घडामोडी सुरू आहेत का अशी चर्चा आता जोर धरू लागलीय.