Gadchiroli, Chhattisgarh Naxalite

खून, जाळपोळ, चकमक अशा विविध गुन्ह्यात सहभागी असलेला जहाल नक्षलवादी चैनुराम ऊर्फ सुक्कु वत्ते कोरसा (छत्तीसगड) याला गडचिरोली पोलिसांच्या विशेष अभियान पथकाने अटक केली आहे. छत्तीसगड सीमेवरील जारावंडी ते सोहगावला जाणाऱ्या कुरमावडा फाट्यावर ही कारवाई करण्यात आली. चैनुरामवर महाराष्ट्र शासनाने 16 लाख रुपयांचे बक्षीस जाहीर केले होते.

शनिवारी नक्षलवादी चैनुराम गडचिरोली जिल्ह्याच्या सीमावर्ती भागातील जारावंडी आणि पेंढरी पोलीस ठाण्याच्या हद्दीत घातपात घडवण्याच्या उद्देशाने रेखी करताना आढळून आला. त्याला विशेष अभियान पथकाने अटक केली. 26 जून 2002 मध्ये चैनुराम पार्लकोटा दलात भरती झाला होता. 2003 पर्यंत तो एसीएम पदावर कार्यरत होता. त्यांनतर पदोन्नती मिळाली होती. 2014 पर्यंत तो मर्ड डिव्हिजन मध्ये कार्यरत होता. त्याच्यावर चकमकीचे सात आणि खुनाचा एक गुन्हा दाखल झाला आहे, अशी माहिती गडचिरोलीचे पोलीस अधीक्षक निलोत्पल यांनी दिली.