सोलापूर : एकनाथ शिंदे गटातील (Eknath shinde) बंडखोर आमदार शहाजीबापू पाटील (Shahajibapu Patil) गुवाहाटीतील झाडी, डोंगर आणि हॉटेलमुळं प्रकाशझोतात आले होते. त्यानंतर सर्वच स्तरातून त्यांच्या या डायलॉगबाजीवर मिश्लिक टीप्पणी करण्यात आली. एव्हढेच नव्हे तर काय झाडी, काय डोंगर, काय हॉटेल यावर गाणीही आली. परंतु, आता पुन्हा एकदा आमदार पाटील यांची राजकीय वर्तुळात जोरदार चर्चा सुरु आहे. सोलापुरात राष्ट्रवादी काँग्रेस महिला आघाडीतर्फे (NCP) आमदार शहाजी बापू पाटील यांना एक भेट पाठवण्यात आलीय. पाटील यांच्या पत्नीला राष्ट्रवादी कॉंग्रेसच्या महिला कार्यकर्त्यांनी (Saree Gift) रेशमी इरकल साडी पाठवली आहे. विधानसभेचे विरोधी पक्षनेते (Ajit Pawar) अजित पवार यांच्या वाढदिवसानिमित्त साडीची भेट देण्यात आली आहे.

पत्नीला लुगडं घेण्याची ऐपत नसल्याचे शहाजी बापू पाटील यांनी प्रतिक्रिया दिली असल्याची चर्चा होती. त्यामुळे पाटील यांच्या पत्नीला शोभेल अशी आठ हजाराची इरकल साडी राष्ट्रवादीतर्फे पाठवण्यात आलीय. सोलापूर महिला राष्ट्रवादी कॉंग्रेसतर्फे ही अनोखी भेट पाटील यांना पाठवण्यात आली आहे.

एका आमदाराला दीड ते पावणे दोन लाख रुपये मानधन असतानाही पाटलीन बाईला साडी घेता आली नाही, म्हणून आम्ही साडी भेट पाठवतोय , अशी प्रतिक्रिया राष्ट्रवादी महिला आघाडीच्या पदाधिकारी विद्या लोलगे आणि सुनिता रोटे यांनी दिली आहे.

Edited By - Naresh Shende