Nashik Stone Pelting News : नाशिक शहरातील काठे गल्ली परिसरात मंगळवारी रात्री अफवेमुळे दगडफेकीची गंभीर घटना घडली. जमावाने पोलिसांवरही दगडफेक केली. त्यानंतर परिसरात तणाव निर्माण झाला. या घटनेत तीन ते चार पोलीस कर्मचारी जखमी झाले असून, पाच वाहनांचेही नुकसान झाले आहे. वीजपुरवठा खंडित झाल्याने संतप्त जमावाने दगडफेक केल्याचे प्राथमिक माहितीतून समोर आले आहे.

मंगळवारी रात्री काठे गल्ली परिसरात अतिक्रमण काढण्याची अफवा पसरल्याने वातावरण तापले. रात्रीच्या वेळी ४०० हून अधिक लोकांचा जमाव जमला आणि त्यांनी दगडफेक सुरू केली. परिस्थिती नियंत्रणात ठेवण्यासाठी नाशिक पोलिसांनी ५०० पोलिसांचा बंदोबस्त तैनात केला होता. तरीही जमावाला नियंत्रित करणे आव्हानात्मक ठरले. दगडफेकीमुळे परिसरातील वीजपुरवठाही खंडित झाला, ज्यामुळे तणाव आणखी वाढला.

२० हून अधिक पोलीस जखमी

नाशिकमध्ये जमावाने केलेल्या दगडफेकीत २ सहाय्यक पोलीस आयुक्त आणि २० हून अधिक पोलिस कर्मचारी जखमी झाले आहे. एका पोलिस कर्मचाऱ्याचा पाय फ्रॅक्चर झाल्याचे समजतेय. दगडफेक करणाऱ्या जमावातील काही जणांना पोलिसांनी ताब्यात घेतलं आहे. मिळालेल्या माहितीनुसार, पोलिसांनी ८ ते १० जणांना ताब्यात घेतले आहे.

नाशिक महानगरपालिकेने न्यायालयाच्या आदेशानुसार १ एप्रिल २०२५ रोजी काठे गल्लीतील एका अनधिकृत दर्ग्याला नोटीस बजावली होती. या नोटीसीत स्वतःहून अनधिकृत बांधकाम काढून घेण्याचे निर्देश देण्यात आले होते, अन्यथा तोडकामाचा इशारा देण्यात आला होता. या नोटीसीनंतर परिसरात तणाव वाढत गेला आणि अफवांमुळे परिस्थिती चिघळली.

परिसरात तणावपूर्ण शांतता

नाशिक पोलिसांनी तातडीने परिसरातील वाहतूक मार्गात बदल केले. त्यामुळे परिस्थिती नियंत्रणात राहील. पोलिसांनी जमावाला पांगवले. दगडफेकीत जखमी झालेल्या पोलिसांवर उपचार सुरू आहेत. तसेच, परिस्थिती नियंत्रणात आणण्यासाठी अतिरिक्त कुमक मागवण्यात आली आहे. सध्या काठे गल्ली परिसरात तणावपूर्ण शांतता आहे. पोलिसांनी नागरिकांना शांतता राखण्याचे आणि अफवांवर विश्वास न ठेवण्याचे आवाहन केले आहे. या घटनेची सखोल चौकशी सुरू असून, दगडफेकीत सहभागी असलेल्यांवर कठोर कारवाईचा इशारा पोलिसांनी दिला आहे.