नाशिक जिल्ह्यासाठी उद्या ९ जुलैला 'यलो अलर्ट' जारी करण्यात आलाय. मुसळधार पावसामुळे जनजीवन विस्कळीत झाले आहे. दरम्यान सुरक्षतेच्या दृष्टीने नाशिकच्या जिल्हा प्रशासनाने सहा तालुक्यातील सर्व शाळांना उद्या सुट्टी देण्यात आली आहे. आंगणवाडी, प्री-स्कूल आणि प्राथमिक अनिवासी शाळा उद्या बंद राहणार आहेत. मात्र इतर सर्व शाळा आणि महाविद्यालये नियमित सुरू राहणार आहे.

यासह जिल्हाधिकाऱ्यांनी जिल्ह्यातील सर्व धबधबे, ट्रेकिंग पॉईंट्स आणि पूरप्रवण पर्यटनस्थळांवर प्रवेशबंदी करण्याचे आदेश देण्यात आलेत. १३ जुलै सकाळी ६ वाजेपर्यंत प्रवेश बंदी असणार आहे. पर्यटकांनी नदी, नाले, धरणे, पूल, घाट परिसर आणि भूस्खलनप्रवण भागात जाणे टाळावे असे प्रशासनाकडून आवाहन करण्यात आले आहे.

नाशिक शहरात गेल्या दोन दिवसांपासून मुसळधार पाऊस पडतोय. काल आणि आज पहाटे पासूनच पावसाने जोरदार हजेरी लावली. ७ जुलै सकाळी साडे आठ ते ८ जुलै रोजी सकाळी साडे आठपर्यंत तब्बल २७० मिमी इतकी पावसाची नोंद करण्यात आली. शहरातील जनजीवन हे पूर्णपणे विस्कळीत झाल्याचे चित्र ठिकठिकाणी दिसून आले. शहरातील प्रमुख नदी गोदावरी आणि नंदिनी नदीला मोठ्या प्रमाणात पूर आला होता.

नाशिक शहर सोबतच त्र्यंबकेश्वर येथे दोन दिवसांपूर्वी भारतीय हवामान खात्याकडून ढगफुटी सदृश्य पाऊस पडण्याची शक्यता वर्तविण्यात आली होती. तर नाशिक शहराला देखील मुसळधार पाऊस होण्याचा इशारा हा देण्यात आला होता.