रोहित कदम, साम टीव्ही

राज्यातील कारागृहे दारूचे अड्डे बनताहेत की काय, अशी सध्याची परिस्थिती निर्माण झालीये. नाशिक रोड मध्यवर्ती कारागृहात जामिनावर सुटलेल्या एका अट्टल आरोपीसोबत कारागृहातील 3 उच्चपदस्थ अधिकाऱ्यांनी चक्क 'दारू पार्टी' केल्याचा प्रकार उघडकीस आलाय. याप्रकरणात नागरी सेवा अधिनियमाचं उल्लंघन आणि कर्तव्यात कसूर केल्याप्रकरणी मस्तवाल अधिकाऱ्यांना 7 दिवसांत खुलासा करण्याचे आदेश दिलेत. विशेष म्हणजे, कारागृहातील अधिकाऱ्यांनी ज्या आरोपीसोबत पार्टी झोडलीये तो पी एल ग्रुप टोळीशी संबंधित असल्याची माहिती समोर आलीये.

हिरालाल भामरे, अशोक मलवाड आणि जगदीश ढुमणे या तिघा तुरुंग अधिकाऱ्यांनी आरोपी गौरव मिश्रासोबत पार्टी केल्याचा व्हिडिओ व्हायरल झालाय.

आरोपी गौरव मिश्राने तोतया आयपीएस अधिकारी बनून अनेकांना गंडा घातला असून लाल दिव्याच्या गाडीसह शहरात पोलिसांचा एस्कॉर्ट घेऊन फिरायचा.

नाशिक पोलीस आयुक्तालयातील अनेक बड्या पोलीस अधिकाऱ्यांसोबत गौरव मिश्रा आयपीएस अधिकारी म्हणून वावरायचा.

याच गौरव मिश्राने अनेक बड्या पोलीस अधिकाऱ्यांच्या रेल्वे पोलीस अधिकाऱ्याच्या मदतीने बदल्या केल्याची माहिती समोर आलीये.

तसंच, गौरव मिश्राने नाशिक मधील पी एल ग्रुपचा म्होरक्या प्रकाश लोंढे आणि भूषण लोंढे यांना कारागृहात मदत मिळण्यासाठी पार्टीचं आयोजन केल्याचा संशय आहे.

'साम टीव्ही'नं हे वृत्त पुराव्यासह दाखवल्यानंतर कारागृह प्रशासनानं आता या तिन्ही अधिकाऱ्यांना कारणे दाखवा नोटीस पाठवलीये. त्यामुळे पुढील काळात या अधिकाऱ्यांवर प्रशासन योग्य ती कारवाई करेल. एकीकडे, खाकी वर्दीतल्या धाकानं सराईत गुन्हेगारांची तंतरायची, मात्र, आता तेच खाकी वर्दीतले अधिकारी आरोपींसोबत दारु पार्टीत रंगलेत. त्यामुळे कायद्याचे रक्षकच अशा पद्धतीने आरोपीच्या गळ्यात गळे घालून पार्ट्या झोडणार असतील तर राज्यातील कायदा-सुव्यवस्थेसमोर गंभीर आव्हान उभं राहिलंय.