अजय सोनवणे 

मनमाड (नाशिक) : नाशिकच्या येवला शहरातील नगर- मनमाड मार्गावर असलेल्या लक्कडकोट या पैठणीच्या दुकानातून काल रात्रीच्या सुमारास चोरी झाली आहे. या दुकानातून सुमारे दीड कोटी रुपयांच्या पैठणी चोरटयांनी चोरून नेल्या आहेत. या प्रकरणी पोलिसात नोंद करण्यात आली आहे.   

नाशिक (Nashik News) जिल्ह्यातील येवला शहरातील नगर- मनमाड मार्गावर असलेल्या लक्कडकोट पैठणी दुकानात हि चोरी झाली आहे. रात्रीच्या सुमारास अज्ञात चोरट्यांनी शोरुमच्या दुकानाची खिडकी तोडत आत प्रवेश केला. यानंतर दुकानातील महागड्या पैठण्या चोरुन (Theft) नेल्या आहेत. सदर घटना सकाळी दुकानचे मालक सुनिल लक्कडकोट यांच्या लक्षात आली. यानंतर त्यांनी याबाबत पोलिसांना फोन करुन माहिती दिली.

चोरट्यांनी महागड्या पैठणी साड्या बरोबरच शोरूममध्ये लावण्यात आलेल्या सीसीटीव्ही कॅमेराचा डीसीआर देखील पळवून नेला आहे. यामुळे पोलिसांपुढे तपासाचे मोठे आव्हान उभे आहे. दरम्यान पोलिसांनी डॉग स्कॉड घटनास्थळी आणत चोरट्यांचा माग घेण्याचा प्रयत्न केला असून पोलिसांनी याप्रकरणी अधिक तपास सुरु केला आहे. एकुणच प्रथमच एवढ्या मोठ्या रकमच्या महागड्या पैठणी चोरी झाल्याने येवला तालूक्यात मोठी खळबळ उडाली आहे.