• नाशिकमधील हनी ट्रॅप प्रकरणाची व्याप्ती वाढल्याचे पाहायला मिळत आहे.

• ७२ वरिष्ठ अधिकाऱ्यांसह शहरातील काही डॉक्टर्स आणि व्यावसायिक देखील हनी ट्रॅपमध्ये अडकल्याची सूत्रांची माहिती

• हनी ट्रॅपचा वापर करून आदिवासी जमिनींचे काही बेकायदेशीर व्यवहार देखील करण्यात आल्याची चर्चा

अभिजीत सोनावणे, साम टीव्ही, प्रतिनिधी

नाशिकमधील हनी ट्रॅप प्रकरणाची व्याप्ती वाढत असल्याचे म्हटले जात आहे. नाशिक शहरातील ७२ वरिष्ठ अधिकाऱ्यांसह काही डॉक्टर्स आणि व्यावसायिक देखील हनी ट्रॅपमध्ये अडकल्याची माहिती सूत्रांकडून समोर आली आहे. डॉक्टर्स आणि व्यावसायिकांनी हनी ट्रॅपमध्ये अडकवून खंडणी उकळल्याचे उघडकीस आले आहे.

नाशिक शहरातील अनेक अधिकारी, डॉक्टर आणि व्यावसायिक हनी ट्रॅपमध्ये अडकल्याचे म्हटले जात आहे. यातील अनेकांनी बदनामी नको म्हणून तडजोड करुन प्रकरण मिटवण्याचा प्रयत्न केल्याच्या चर्चा होत आहे. यामुळे नाशिकमधील हनी ट्रॅप प्रकरणात बदनामी नोक म्हणून 'तेरी भी चूप और मेरी भी चूप' असं सुरु असल्याचा दावा केला जात आहे.

हनी ट्रॅप प्रकरणामध्ये कोट्यावधी रुपयांची तडजोड झाल्याचे म्हटले जात आहे. हॉटेल व्यावसायिकांकडून महसूल आणि पोलीस विभागातील ओळखीचा गैरवापर करत तडजोडीचे प्रकार केले जात असल्याची माहिती सूत्रांनी दिली आहे. या प्रकरणात अडकलेले कुणीही तक्रार करण्यासाठी पुढे येत नसल्याने अडचण होत आहे.

नाशिकमधील हनी ट्रॅप प्रकरणाची व्याप्ती वाढत असताना गुप्तचर विभागाकडून गोपनीय चौकशी सुरु असल्याची मोठी माहिती समोर आली आहे. हनी ट्रॅपचा वापर करुन आदिवासी जमिनींचे काही बेकायदेशीर व्यवहार सुरु असल्याची चर्चा सुरु आहे. हनी ट्रॅपचा वापर करुन करण्यात आलेले आदिवासी जमिनींचे व्यवहार देखील गुप्तचर विभागाच्या रडारवर आहेत.