नाशिक शहरातील पंचवटी भागात काही दिवसांपूर्वी घडलेल्या सागर जाधव गोळीबार प्रकरणात पोलिसांनी मोठी कारवाई करत भाजपचे माजी नगरसेवक जगदीश पाटील यांना पोलिसांनी अटक केली आहे. महत्वाचे म्हणजे मंत्री गिरीश महाजन हे नाशिकमध्ये शनिवारी रात्री दाखल झाले आणि आज पोलिसांनी जगदीश पाटील यांना अटक केल्याने राजकीय वर्तुळात मोठी खळबळ उडाली आहे.

काही दिवसांपूर्वी पंचवटी येथील फुलेनगर भागात सागर विठ्ठल जाधव या युवकावर गोळीबार करण्यात आला होता. या हल्ल्यात तो गंभीर जखमी झाला असून त्याच्यावर सध्या खासगी रुग्णालयात उपचार सुरू आहेत. पोलिसांच्या तपासात या हल्ल्यामागे पूर्ववैमनस्य आणि टोळीयुद्ध असल्याचे समोर आलेय. पोलिसांनी या प्रकरणात 11 आरोपींना अटक केली होती. तर दोन आरोपी अद्यापही फरार असून पोलिसांकडून त्यांचा शोध घेतला जात आहे.

या तपासादरम्यान भाजपचे माजी नगरसेवक जगदीश पाटील यांचा देखील यामध्ये समावेश असल्याचे समोर आले. यानंतर पोलिसांनी त्यांना आज अटक केली आहे. पोलिसांनी त्यांना वैद्यकीय तपासणीसाठी जिल्हा रुग्णालयात दाखल केलेय. यामुळे नाशिकमध्ये एकच खळबळ उडाली आहे.

काही दिवसांपूर्वीच माजी नगरसेवक उद्धव निमसेला अटक

राहुल धोत्रे हत्याकांड प्रकरणी अनेक दिवस फरार असलेला भाजपचा माजी नगरसेवक उद्धव (बाबा) निमसे याला देखील पोलिसांनी बेड्या ठोकल्या आहेत. येणाऱ्या काही दिवसातच स्थानिक स्वराज संस्थांच्या निवडणुका होणार आहे आणि तत्पूर्वी भाजपच्या दोन माजी नगरसेवकांना अटक केल्याने पक्षाच्या प्रतिमेला तडा गेला आहे. यामुळे आगामी निवडणुकीत याचा नेमका काय परिणाम होतो हे पाहणं महत्वाचे ठरणार आहे.