नाशिकमध्ये बिबट्यांचा संचार दिवसेंदिवस वाढत आहे. जंगल कमी झाल्यामुळे त्यांचा मानवी वस्तीत वावर जास्त वाढला आहे. बिबट्या खुलेआम रस्त्यावर वावरताना दिसत आहे. नाशिकमध्ये दरी मातोरी परिसरात पुन्हा एकदा बिबट्याचे दर्शन झाले आहे. बिबट्या रात्रीच्या वेळी स्थानिक नागरिकांच्या घराबाहेर खुलेआम वावरत असलेला दिसत आहे.

नाशिकमध्ये रात्रीच्या वेळी बिबट्या दिसत असल्याच्या घटना समोर आल्या होत्या. मात्र, आता बिबट्या थेट घराच्या अंगणात दिसल्याने भीतीचे वातावरण निर्माण झाले आहे. गोकुळ बोडके यांच्या घराबाहेर बिबट्या वावरत असल्याचे समोर आले आहे. त्यांच्या घराबाहेर लावलेल्या सीसीटीव्ही कॅमेरात बिबट्या कैद झाला आहे. रात्री घरात सर्वजण झोपले असताना बाहेर बिबट्याचा वावर होता.

गेल्या काही दिवसांपासून नागरी वस्तीमध्ये बिबट्यांचा वावर वाढला आहे. या घटनेनंतर दरी मातोरी परिसरात पिंजरा लावण्याची मागणी स्थानिकांनी केली आहे. बिबट्या सीसीटीव्ही कॅमेरात कैद झाल्याचा व्हिडिओ समोर आला आहे. या व्हिडिओत रात्री बिबट्या घराच्या आजूबाजूला वावरताना दिसत आहे. घराच्या अंगणात असलेल्या फरशीवरदेखील बिबट्याचा वावर दिसत आहे. बिबट्या अगदी पाळीव कुत्रा असल्यासारखा वावरताना दिसत आहे. त्यामुळे नागरिकांमध्ये भीतीचे वातावरण पसरले आहे.

स्थानिक वस्तीत बिबट्याचा वावर दिवसेंदिवस वाढत आहे. काही दिवसांपूर्वी नंदुरबार तालुक्यातील ढोंग शिवारातील शेतात मका कापणी करत असताना बिबट्याचे पिल्ली आढळून आले होते. हे पिल्लू घेऊ जाताना बिबट्या मादी सीसीटीव्ही कॅमेरात कैद झाली होती.