तबरेज शेख, प्रतिनिधी...

Nashik Crime News: काही महिन्यांपूर्वी लहान मुलांच्या भांडणाचा वचपा काढण्यासाठी तरुणांवर घरात घुसून प्राणघातक हल्ला केल्याची घटना नाशिकमध्ये घडली आहे. नाशिकच्य अंबड परिसरात झालेल्या या हल्ल्यात दोघांचा मृत्यू झाला. या घटनेने संपूर्ण नाशिक शहरात खळबळ उडाली आहे. (Crime News In Marathi)

नाशिकच्या (Nashik) अंबड परिसरात चुंचाळे शिवारात ही धक्कादायक घटना घडली आहे. काही दिवसांपूर्वी या ठिकाणी लहान मुलांची भांडणे झाले होते. याच भांडणाचा वचपा काढण्यासाठी चुंचाळेतील सहा ते सात जणांच्या टाेळक्याने संजीवनगरात एका तरुणाच्या घरात घुसून हल्ला केला. या हल्ल्यात छातीवर वार केल्याने मिराज खान (वय १८) या तरुणाचा जागीच मृत्यू झाला .

यावेळी भांडण साेडविण्यासाठी मध्यस्थी करणाऱ्या तरुणाचा चुलत भाऊ इब्राहिम हसन शेख (वय २३, रा. संजीवनगर) याच्यावरही हल्ला केला. या हल्ल्यात तो गंभीर जखमी झाला होता, ज्याचा उपचारादरम्यान मृत्यू झाला. सुदैवाने या हल्ल्यावेळी तिसरा भाऊ पळून गेल्याने त्याचा जीव वाचला.

ही संपूर्ण घटना सीसीटीव्ही (CCTV) कॅमेऱ्यात कैद झाली आहे. या भयंकर घटनेनंतर जिल्हा रुग्णालयात नातेवाईकांनी गर्दी केल्याने परिसरात तणावाचे वातावरण निर्माण झाले आहे. पोलीस सध्या या हल्लेखोरांचा शोध घेत आहेत. धक्कादायक बाब म्हणजे ही सगळी घटना परिसरातील महिला आणि लहान मुलांसमोर झाल्याने नागरिकांमध्ये भीतीचे वातावरण निर्माण झाले आहे. (Latest Marathi News)