तबरेज शेख 

नाशिक : रात्रीच्या अंधारात शस्त्र घेऊन दरोडा टाकण्याचा प्लॅन आखण्यात आला होता. मात्र दरोडा टाकण्यापूर्वी पोलीस आल्याने हा प्रयत्न फसला. नाशिकच्या देवळाली गाव येथील कुस्ती मैदान येथे दरोडा टाकण्यासाठी आलेल्या पाच जणांना उपनगर पोलिसांनी ताब्यात घेतले आहे. पोलीस गस्तीवर असल्याने चोरट्यांचा हा प्लॅन फसला आहे. 

नाशिकच्या देवळाली गावात २६ एप्रिलच्या मध्यरात्रीच्या सुमारास काही युवकांकडून संशयास्पद हालचाली होत असल्याची माहिती पोलिसांना मिळाली होती. याद्वारे पोलीस पथक देवळाली परिसरात गस्त घालत असताना सात ते आठ जण संशयीतपणे फिरत असल्याचे निदर्शनास आले. पोलिसांनी त्यांना विचारणा करण्यासाठी गेले असता त्यांनी पळ काढला. 

खिशातील बंदुकीतून झाला फायर 

दरम्यान पोलिसांना पाहून पळून जात असताना एकाच्या पँटच्या खिशात असलेल्या पिस्तुलमधून अचानक फायर झाला. यात तो जखमी झाला होता. दरम्यान नाशिकच्या बिटको रुग्णालयात तो उपचारासाठी दाखल होता. याबाबत माहिती मिळाल्यानंतर पोलिसांनी त्याला ताब्यात घेण्यात आले. पोलिसांनी त्याची अधिक चौकशी केली असता त्यांच्याकडून मिळालेल्या माहितीनंतर इतर चार संशयीत आरोपींना ताब्यात घेण्यात आले आहे.  

सर्व संशयित रेकॉर्डवरील गुन्हेगार 

चारही संशयीत आरोपी ही रेकॉर्डवरचे गुन्हेगार असल्याचे समोर आले आहे तर इतर काही संशयित फरार आहेत. अटक करण्यात आलेल्या पाच जणांना न्यायालयात हजर केले असता दोन दिवसांची पोलीस कोठडी सुनावण्यात आली आहे. या घटनेनंतर उपनगर पोलीस ठाण्यात गुन्हा दाखल करण्यात आला असून पुढील तपास उपनगर पोलीस करत आहे.