तबरेज शेख 
नाशिक : नवीन वर्षाच्या प्रारंभी शहरामध्ये सराईत गुन्हेगाराची हत्या झाल्याची घटना घडली आहे. यात पाच ते सहा जणांच्या टोळक्याने हल्ला करत डोक्यात दगड घालून निर्घृण खून केल्याचा प्रकार नाशिकच्या क्रांतीनगर सार्वजनिक बांधकाम भवन या परिसरात घडला आहे. या घटनेने खळबळ उडाली असून पोलिसांनी काही जणांना ताब्यात घेतले आहे. 

सरत्या वर्षाला निरोप देत नववर्षाचे स्वागत करण्यासाठी अनेक ठिकाणी पार्टी करण्यात आल्या. या पार्टीमध्ये मद्य प्राशन करून काहीजण गोंधळ घालत असतात. तर मद्य प्राशन करून वाहन चालवत असतात. अशाना चाप बसण्यासाठी पोलीस प्रशासन अलर्ट होते. या अनुषंगाने ठिकठिकाणी नाकेबंदी करत पोलीस गस्तीवर होते. याच दरम्यान नाशिक शहरात खून झाल्याची घटना घडल्याने खळबळ उडाली आहे. या घटनेत लक्ष्मण पोपट घारे (वय २८) असे मृत झालेल्या व्यक्तीचे नाव आहे. 

जुन्या वादातून मारहाण 

पोलिसांनी दिलेल्या माहितीनुसार नाशिक शहरात सर्वत्र नाके बंदीची कारवाई सुरू असताना क्रांती नगर सार्वजनिक बांधकाम विभागाच्या शेजारी मोकळ्या जागेत चार ते पाच संशयित मद्य पिऊन धिंगाणा घालत होते. याचा परिसरातील राहणारा लक्ष्मण घारे या सराईत सोबत या टोळक्यातील दोघा- तिघा संशयित सोबत पूर्वीचे वाद होते. वादाचे रूपांतर हाणामारीत झाले. त्यानंतर टोळक्यातील काही जणांनी लक्ष्मणच्या डोक्यात दगडाने घालून हत्या करण्यात आली. 

चौघेजण ताब्यात 

नवीन वर्षाच्या प्रारंभी शहरात खुनाची घटना घडल्याने परिसरात दहशत निर्माण झाली आहे. टोळक्याकडून हत्या झाल्याचे पोलिसांना माहिती मिळाल्यानंतर पोलिसांनी घटनास्थळी जात पंचनामा केला. दरम्यान या घटने बाबत मुंबई नाका पोलीस ठाण्यात गुन्हा दाखल करण्यात आला असून हत्या करणाऱ्या टोळक्यातील चौघांना पोलिसांनी ताब्यात घेतले आहे.