>> अजय सोनावणे

Nashik Latest News : नाशिकमध्ये एक भीषण अपघात झाल्याची बातमी समोर आली आहे. नाशिक-चावंड तालुक्यातील आसरखेडा जवळ एसटी बसचा अपघात झाला आहे. अपघातात चार ते पाच जण जखमी झाल्याची माहिती आहे. जखमींना जवळच्या रुग्णालयात उपचारसाठी दाखल करण्यात आल्याचं सांगण्यात येत आहे.

मिळालेल्या माहितीनुसार, वाणी गडावरून मनमाडकडे येणाऱ्या एसटी महामंडळाच्या बसला चांदवड जवळच्या मतेवाडी जवळ अपघात होऊन यात महिला कंडकटरचा मृत्यू झाला आहे. बसचा स्टेरिंग रॉड तुटल्याने बस चालकाचे बसवरील नियंत्रण सुटले आणि बस जोरात झाडावर आदळली.

या अपघातात 4 ते 5 प्रवाशी गंभीर जखमी झाले आहेत. तर काही प्रवाशांना मार लागलाय. या सर्व प्रवाशांना चांदवडच्या शासकीय रुग्णालयात उपचारासाठी दाखल करण्यात आले आहे. हा अपघात इतका भीषण होता की यात एसटी बसचा अक्षरशः चुराडा झाला आहे. (Latest Marathi News)

मुंबई-गोवा महामार्गावर अपघातात आजीसह दोन चिमुकल्यांचा मृत्यू

दरम्यान, आज मुंबई-गोवा महामार्गावर देखील भीषण अपघात झाला आहे. येथे कार आणि ट्रकमध्ये झालेल्या भीषण अपघातात तीन जणांचा मृत्यू झाला आहे. मृतांमध्ये आजीसह दोन लहानग्या नातवांचा समावेश आहे. माणगाव तालुक्यातील कशेणे गाव हद्दीत हा अपघात झाला.

मुंबईतील बोरिवली येथे राहणारे तावडे कुटुंबीय आपल्या कारमधून बोरिवली येथून देवगडला जात होते. दरम्यान माणगावमधील कशेणे गाव हद्दीत त्यांची कार आणि ट्रकमध्ये भीषण अपघात झाला.

समृद्धी महामार्गावर अपघात, दोघांचा मृत्यू

समृद्धी महामार्गावर शिर्डीहून छत्रपती संभाजीनगरकडे येत असताना झालेल्या भीषण अपघातात दोघांचा जागीच मृत्यू झाला असून एक जण गंभीर जखमी आहे. गाडीचा टायर फुटल्याने हा अपघात झाल्याची माहिती आहे.