सचिन बनसोडे, नाशिक

Nashik Ashok Kharat Case Update नाशिकमधील ‘कॅप्टन’ नावाने ओळखल्या जाणाऱ्या भोंदू अशोक खरात प्रकरणाची चर्चा राज्यभर सुरू असतानाच, शिर्डी पोलिसांनी आणखी एका अशोक खरात नावाच्या भोंदूला अटक करून मोठी कारवाई केली आहे. आंतरजातीय प्रेमविवाह निर्विघ्न पार पडावा आणि विवाहानंतर जोडप्यावर नातेवाईकांनी केलेली करणी दूर करावी, असे आमिष दाखवत या भोंदूने एका जोडप्याकडून तब्बल ५१ हजार रुपये उकळल्याचा धक्कादायक प्रकार समोर आला आहे.

मिळालेल्या माहितीनुसार, सांगली जिल्ह्यातील अभिजित निकम याचे एका तरुणीसोबत प्रेमसंबंध होते. दोघांनी लग्न करण्याचा निर्णय घेतला होता. मात्र आंतरजातीय लग्न असल्याने काही अडचणी निर्माण होऊ शकतात, अशी भीती संबंधित तरुणीच्या मनात निर्माण करण्यात आली. याचाच फायदा घेत कोपरगाव तालुक्यातील सोनेवाडी येथील अशोक खरात याने स्वतःकडे दैवी शक्ती असल्याचा दावा केला.

विवाहात अडथळे येणार असून नवऱ्यावर संकट आहे, तसेच नातेवाईकांकडून करणी करण्यात आल्याचे सांगत त्याने दाम्पत्याला घाबरवले. या सर्व संकटांपासून मुक्ती मिळवून देण्यासाठी विविध पूजा, विधी आणि धार्मिक अनुष्ठान करण्याचा सल्ला त्याने दिला. गेल्या वर्षभरात पूजा-अर्चा आणि विशेष विधींच्या नावाखाली त्याने दाम्पत्याकडून वेळोवेळी ५१ हजार रुपये घेतल्याचे तपासात समोर आले आहे. दरम्यान, अमावास्येच्या दिवशी विशेष पूजाविधी करण्यासाठी अशोक खरात याने संबंधित दाम्पत्याला बोलावले होते. याबाबतची माहिती शिर्डी पोलिसांना मिळाल्यानंतर त्यांनी तातडीने सापळा रचला. पोलिसांनी घटनास्थळी धाड टाकून अशोक खरात याला रंगेहात ताब्यात घेतले. तसेच त्याची साथीदार माया विठ्ठल कुसळकर हिलाही राहाता परिसरातून अटक करण्यात आली.

अभिजित निकम यांच्या फिर्यादीवरून शिर्डी पोलिस ठाण्यात अशोक खरात आणि त्याच्या साथीदाराविरोधात महाराष्ट्र नरबळी व इतर अमानुष, अनिष्ट आणि अघोरी प्रथा व जादूटोणा प्रतिबंधक कायद्यानुसार गुन्हा दाखल करण्यात आला आहे. या भोंदूने अशाच प्रकारे आणखी किती नागरिकांची फसवणूक केली आहे, याचा शोध पोलिस घेत आहेत. आर्थिक लाभासाठी अंधश्रद्धेचा आधार घेत लोकांना गंडा घालणाऱ्या या प्रकरणाचा शिर्डी पोलीस सखोल तपास करत आहेत.