जळगाव : राज्यात विधानसभा निवडणुकांपूर्वी सुरू करण्यात आलेली मुख्यमंत्री माझी लाडकी बहीण योजना गेमचेंजर ठरली. या योजनेतून महिलांना दरमहा १५०० रुपये देण्यात येत असून निवडणुकांच्या जाहीरनाम्यात पुन्हा महायुतीचं सरकार आल्यास लाभार्थी महिलांना २१०० रुपये देण्याचं आश्वानस सरकारने दिलं होतं. मात्र, अद्यापही महिलांना १५०० रुपयेच दिले जातात. तर, २१०० रुपये कधी द्यायचे ते आर्थिक बजेट पाहून निर्णय घेऊ, असं अर्थमंत्री अजित पवार यांनी यापूर्वी म्हटलं होतं. तर, आता राज्याचे कॅबिनेटमंत्री नरहरी झिरवळ यांनी २१०० रुपये देण्यासंदर्भात खळबळजनक वक्तव्य केलं आहे. 'लाडक्या बहि‍णींना २१०० रुपये देऊ असं कुणीच म्हटलं नाही', असं म्हणत झिरवळ यांनी चक्क २१०० रुपये देण्यावरुन यू-टर्न घेतला आहे.

लाडकी बहिण योजनेचा एप्रिल महिन्यातील हफ्ता कधी जमा होणार, याची प्रतिक्षा सध्या लाडक्या बहिणींना आहे. तसेच, १५०० रुपयांचे २१०० कधी होणार याची देखील उत्सुकता ताणली गेली आहे. मात्र, लाडक्या बहिणींच्या हप्त्यावरुन सत्ताधाऱ्यांची टोलवाटोलवी सुरूच असल्याचं पाहायला मिळत आहे. 'लाडक्या बहि‍णींना २१०० रुपये देऊ असं कुणीच म्हटलं नाही', असं राज्याचे कॅबिनेटमंत्री नरहरी झिरवळ यांनी म्हटलंय. विरोधकांनीच २१०० रुपयांवर जोर लावलाय. लाडक्या बहि‍णींना १५०० रुपयेही पुरेसे आहेत, त्या खूश आहेत, असं म्हणत झिरवळ यांनी २१०० रुपये देण्यावरुन घुमजाव केला आहे.

लाडकी बहीण योजना विधानसभा निवडणुकीत महायुतीसाठी गेमचेंजर ठरली. महायुतीचे घटक पक्ष भाजप, शिवसेना आणि राष्ट्रवादी काँग्रेसच्या विजयामध्ये या योजनेचा वाटा महत्त्वाचा ठरला. कारण, महायुतीचं सरकार आल्यास लाडक्या बहिणींना दरमहा २१०० रुपये देऊ, असं आश्वासन देण्यात आलं होतं. मात्र, महायुती सरकार पुन्हा सत्तेत येऊन देखील लाडक्या बहिणींच्या हप्त्यामध्ये पुन्हा वाढ न करण्यात आल्याने विरोधकांकडून सवाल उपस्थित करण्यात येत आहेत. त्यावर जाहीरनामा ५ वर्षांसाठी असतो, असं उत्तर सत्ताधाऱ्यांकडून देण्यात आलं आहे. मात्र, आता तर १५०० रुपयांत लाडक्या बहिणी खुश आहेत, २१०० रुपये देऊ असं म्हटलंच नसल्याचं राज्य सरकारमधील मंत्री झिरवळ यांनी म्हटलं आहे.