सागर निकवाडे 

नंदुरबार : सभेचा अजेंडा आणि प्रोसिडिंग मिळत नाही. त्यासोबत सत्ताधाऱ्यांकडून मनमानी कारभार चालवला जात असल्याचा आरोप विरोधकांनी केला असून मनमानी कारभाराच्या विरोधकांनी सभागृहातून सभा त्याग केला. तर दुसरीकडे सत्ताधाऱ्यांना देखील महत्त्वाच्या विषयावर विरोधकांना गांभीर्य नसल्याचा आरोप करत विरोधकांची भूमिका चुकीची असल्याचा प्रत्यारोप केला आहे. यामुळे जोरदार खडाजंगी उडाली. 

नंदुरबार (Nandurbar) जिल्हा परिषदेचे सर्वसाधारण सभा जिल्हा परिषद अध्यक्ष सुप्रिया गावित यांच्या अध्यक्षतेखाली सुरू झाली. या सभेत विरोधकांनी अनेक प्रश्न उपस्थित करत अधिकाऱ्यांवर प्रश्नाचा भडीमार करण्यास सुरुवात केली. (Nandurbar Zp) यातूनच सभागृहात विरोधात वातावरण निर्माण झाले. याच वेळी सत्ताधारी काही सदस्यांनी विरोधी सदस्यांकडे माईक हिसकवण्याचा प्रयत्न केला. या झालेल्या वादावादीनंतर विरोधकांनी सभागृहातून सभा त्याग केला आहे. सत्ताधाऱ्यांनी बोलावलेली सभा बेकायदेशीर असून या विरोधात उच्च न्यायालयात जाणार असल्याच माजी जिल्हा परिषद उपाध्यक्ष राम रघुवंशी यांनी सांगितले. 

नंदुरबार जिल्ह्यातल्या दुर्गम भागातील खराब रस्ते आरोग्य सेवा आणि यासारख्या महत्त्वाच्या विषयावर सभेमध्ये चर्चा करायची होती. मात्र विरोधकांना या विषयाचे गांभीर्य नसल्याने त्यांनी सभेत गोंधळ घालण्यात सुरुवात केल्याचा आरोप जिल्हा परिषद अध्यक्ष सुप्रिया गावित यांनी केला आहे. तर जिल्हा परिषदेच्या सभागृहात सत्ताधाऱ्यांनी विरोधकांमध्ये चांगलीच खडाजंगी झाल्याचे पाहण्यास मिळाले. आगामी काळातील राजकारण तापणार असल्याचं या जिल्हा परिषदेच्या सर्वसाधारण सभेवरून सिद्ध झाले आहे.